Të akuzuarit për aksidentin në Llaskarcë mbeten në paraburgim shtëpiak

Të akuzuarit për aksidentin e tmerrshëm që ndodhi në Llaskarcë, ku humbën jetën 16 persona ndërsa 38 të tejrë kishin lëndime të rënda trupore mbeten në paraburgim shtëpiak, pasi që Gjykata Themelore e Shkupit e refuzoi propozimin e Prokurorisë Publike të Shkupit për caktimin e masës së paraburgimit.

“Duke vepruar me propozim të Prokurorisë Themelore Publike për caktimin e masës së paraburgimit për gjashtë persona, të përfshirë në aktakuzën për aksidentin që ndodhi në Llaskarcë më 13.02.2019, Këshilli Gjyqësor pranë Gjykatës Penale Shkup pas shqyrtimit të fakteve dhe dëshmive në propozim solli vendim ku refuzohet propozimi i Prokurorisë për caktimin e masës së paraburgimit duke e refuzuar si të pa bazë, dhe e vazhdoi masën e paraburgimit shtëpiak për 30 ditë të reja”, thuhet në njoftimin e  gjykatës, përcjell Telegrafi Maqedoni.

Lexo po ashtu Prokuroria ngrit aktakuzë ndaj gjashtë personave për aksidentin në Llaskarcë

Ndryshe, Prokuroria Publike e Shkupit dje ngriti aktakuzë kundër gjashtë personave, të dyshuar se kanë kryer vepra të rënda kundër sigurisë së njerëzve dhe pronës në komunikacion për aksidentin që ndodhi në Llaskarcë./Telegrafi/