​Takimi i 17 dhjetorit në Bruksel mbetet i paqartë pas sulmit terrorist në kanalin e Ibër-Lepencit

Bashkimi Evropian nuk ka bërë të ditur nëse do të zhvillohet takimi i caktuar më 17 dhjetor, në nivel kryenegociatorësh, pas sulmit terrorist në kanalin e Ibër Lepencit.

As Qeveria e Kosovës nuk dha ndonjë përgjigje për KosovaPress, nëse do të kushtëzojnë pjesëmarrjen në takimin e dialogut Kosovë-Serbi, pas zhvillimeve të fundit në veri të vendit.

Në ekzekutiv ishin të heshtur edhe sa i përket mundësisë për takim trilateral dhe për agjendën e diskutimit mes kryenegociatorit kosovar, Besnik Bislimi dhe homologut të tij serb, Petar Petkoviq.

Ndërkohë deputetë të Lëvizjes Vetëvendosje, nuk presin përparim në dialog, përderisa siç thonë, vazhdon qasja destruktive e Serbisë. Skeptik për progres në dialog janë edhe nga opozita dhe njohës të këtij procesi.

Institucionet e Kosovës kanë akuzuar Serbinë se qëndron prapa sulmit të fundit terrorist në veri, ku u cenua infrastruktura kritike e Kosovës, derisa Serbia ka mohuar akuzat.

Deputeti i Lëvizjes Vetëvendosje, Driton Hyseni thotë se nuk mund të ketë përparim në dialog me qasjen e njëanshme të ndërmjetësit, Miroslav Lajçak, si dhe me destruktivitetin e Serbisë.

“Në këtë takim unë nuk shoh ndonjë mundësi që të kemi diçka të re. Ndërmjetësuesi është po i njëjti, Miroslav Lajçak, i cili pothuajse gjatë tërë procesit negociator me qëndrimet e tij jobalancuese në raport me kërkesat e Serbisë, ka bërë që takimet mos të kenë rezultat. Po ashtu, njëkohësisht të kemi një pozicionim të Serbisë karshi kërkesave të saj dhe nevojës që ato të implementohen nga ana e Kosovës në mënyrë të njëanshme. Është pala e Serbisë që është jokonstruktive në dialog dhe ajo që i bën karshillëk marrëveshjes që është arritur. Në këtë drejtim nuk duket në horizont ndonjë qasje e Serbisë për respektim të marrëveshjes”, thotë ai.

Opozita ndërkaq kritikon Qeverinë për mostrasparencë në procesin e dialogut me Serbinë. Kryetarja e Komisionit parlamentar të Integrimit Evropian nga radhët e LDK-së, Rrezarta Krasniqi, thotë se me Qeverinë aktuale nuk mund të ketë përparim në këtë proces.

“Nga kjo qeveri nuk pres (progres në dialog). Tash e katër vite s’ka bërë asgjë për dialogun, ku s’ka pas transparencë. Ne kemi kuptuar përmes mediave se kur po takohen përfaqësuesit e BE-së dhe Kosovës. S’pres që të ketë diçka të re. Ju e dini që kemi një marrëveshje në të cilën nuk jemi pajtuar si LDK. Kjo është një marrëveshja më e dëmshme që ka bërë ndonjëherë Kosova”, deklaron ajo.

Ndërkaq, njohësi i integrimit evropian, Avni Mazrrezku mendon se takimi 17 dhjetorit është vetëm përmbushje e agjendës së emisarit, Lajçak.

“Më tepër është me përmbushë chek-listën e zotëri Lajçak për punën e tij si teknokrat i BE-së dhe me arsyetuar pagën e vet. Përndryshe edhe zotëri Lajçak ka qenë nga një shtet jonjohës i pavarësisë së Kosovës. Lajëak se ka përdorë rolin dhe pozitën e tij që t’i ndihmojë politikës së zgjerimit të BE-së”, thekson Mazrreku.

Takimi i fundit mes Kosovës dhe Serbisë në nivel të kryengeciatorëve u mbajt më 24 tetor në Bruksel, por nuk u arrit ndonjë rezultat konkret drejt zbatimit të marrëveshjes së Brukselit dhe aneksit të Ohrit, të dakorduar nga palët në vitin 2023./kp/