Tajvani në gatishmëri për ‘valën’ e testeve raketore në veri të Kinës

Ministria e Mbrojtjes e Tajvanit ka njoftuar se po monitoron “valën” e testeve të raketave në rajonin verior të Kinës dhe se forcat e saj të mbrojtjes ajrore janë në gatishmëri.

Tajvani i qeverisur në mënyrë demokratike, të cilin Kina e sheh si territorin e saj, vëzhgon nga afër të gjitha aktivitetet ushtarake kineze duke pasur parasysh aktivitetet e rregullta të Pekinit rreth ishullit, por rrallëherë publikon detaje të asaj që sheh që ndodh brenda Kinës.

Ndërkohë së fundmi, ministria tha se kishte zbuluar “valë të shumëfishta lëshimesh provë” nga Forcat Raketore të Kinës në Mongolinë e Brendshme, e cila shtrihet rreth 2,000 kilometra nga Tajvani.

Forcat e Tajvanit po monitorojnë vazhdimisht zhvillimet dhe forcat e mbrojtjes ajrore janë në gatishmëri, deklaroi ministria, pa dhënë detaje, shkruan Reuters, përcjell Telegrafi.

Ndryshe, në gusht të vitit 2022, Kina gjuajti raketa në ujërat përreth Tajvanit gjatë lojërave luftarake për të shprehur zemërimin për një vizitë në Taipei nga kryetarja e atëhershme e Dhomës së Përfaqësuesve të SHBA-së, Nancy Pelosi.

Lexo po ashtu Tajvani monitoron rritjen e aktiviteteve të ushtrisë kineze - e quan Kinën kërcënim për stabilitetin rajonal

Sipas burimeve të sigurisë, Tajvani operon stacione të fuqishme radarësh në disa nga majat e vargmalit të tij qendror malor që mund të shikojnë larg në Kinë.

Kina e quan “separatist” presidentin e Tajvanit, Lai Ching-te, i cili mori detyrën në maj, dhe ka rritur presionin e saj ushtarak duke përfshirë lojërat e luftës që nga inaugurimi i tij.

Lai ka ofruar vazhdimisht bisedime me Kinën, por është refuzuar.

Ai hedh poshtë pretendimet e Pekinit për sovranitet, duke thënë se vetëm njerëzit e Tajvanit mund të vendosin për të ardhmen e tyre. /Telegrafi/