Tahiri: Nesër do të procedojmë kallëzim penal në Prokurorinë Speciale për anëtarët e ZRRE-së

Shefi i Grupit Parlamentar i Partisë Demokratike e Kosovës, Abelard Tahiri ka përsëritur sot pas mbledhjes së Kryesisë së Kuvendit se nuk do të marrin pjesë në asnjë votim pa u themeluar Komisioni hetimor për energjinë.

Tahiri tha se rreth dy orë kanë diskutuar në mbledhjen e Kryesisë së Kuvendit, ndërsa i tërë debati ishte për Komisionin hetimor.

“U bë dy orë kjo mbledhja e Kryesisë dhe e tëra thuajse ishte për Komisionin hetimor. Kemi pasur një debat goxha të gjatë, argumente e kundër-argumente”, tha ai.

“Pretendojmë se aty ka pasur manipulime të mëdha… Nuk tërhiqemi nga kërkesat tona legjitime. Hetimi parlamentar është instrument i opozitës… Nuk ka gjë më të rëndësishme se transparenca”, tha shefi i GP-së së PDK-së.

Tahiri përsëriti qëndrimin se PDK nuk do të merr pjesë në votime në seancat e Kuvendit dhe as në Komisionet parlamentare.

Sa i përket mos respektimit të vendimit të gjykatës për tarifat e energjisë elektrike, Tahiri tha se qysh nesër do të procedojë kallëzim penal në Prokurorinë Speciale për secilin anëtarë të ZRRE-së.

“Ne qysh nesër do të procedojmë me kallëzim penal në Prokurorinë Speciale për secilin anëtarë veç e veç të ZRRE-së”, tha ai.

“Ky është një harraq që këta vartës të Albin Kurtit kanë vendosur me ua vënë qytetarëve të Kosovës, por ne nuk do ta tolerojmë në gjë të tillë”, tha ai. /Telegrafi/