Sykaltrit kanë një stërgjysh të përbashkët

Një studim i ri tregon se njerëzit me sy të kaltër kanë një stërgjysh të përbashkët. Një grup studiuesish nga Universiteti i Kopenhagës, kanë përcjell një mutacion gjenetik i cili kishte ndodhur 6 deri10 mijë vjet më përpara, i cili supozohet të jetë shkaktar i ngjyrës së syve te të gjithë personat në botë me sy të kaltër.

Natyrshëm, të gjithë kemi pasur sy kafe. Mirëpo, një mutacion gjenetik që kishte përfshirë gjenin OCA2 të kromozomeve, kishte bërë një ndryshim në ngjyrën e syve. Gjeni OCA2 kodon proteinën P e cila është përgjegjëse për prodhimin e melaninës (pigmenti që i jep ngjyrë lëkurës, flokëve dhe syve). Ndryshimi i cili është afër gjenit OCA2 zvogëlon prodhimin e melaninës në iris, kështu sytë kafe bëhen të kaltër.

Veprimi ndërrues në OCA2 është shumë specifik. Nëse gjeni do të shkatërrohej tërësisht, njerëzit do të ishin pa melaninë në lëkurë, flokë dhe sy- gjendje e njohur si albinizëm.

Ndryshimi i ngjyrës së syve nga kafe në të gjelbër mund të shpjegohet me sasinë e melaninës në iris, ndërsa personat me sy të kaltër kanë një shkallë shumë të vogël ndryshimi në sasinë e melaninës në sy.

Nga kjo mund të përfundojmë se të gjithë sykaltrit janë të lidhur me një stërgjysh. Të gjithë ata kanë trashëguar të njëjtin ndryshim në po të njëjtin vend të ADN-së së tyre.

Grupi studiues ka ekzaminuar ADN mitokondriale dhe e ka krahasuar ngjyrën e syve te sykaltrit në vende që dallojnë, si Jordani, Danimarkë dhe Turqi. Rezultatet që kanë pasuar, pas një dekade hulumtimesh gjenetike, për herë të parë kanë implikuar gjenin OCA2 si përgjegjës për ngjyrën e syve.