Spasovski për pretendimet e Mickoskit për Onkologjinë: Çdokush që ka dëshmi, t’i dorëzojë në Prokurori

“Me rëndësi është për cilën do procedurë që zhvillohet, në qoftë se cili do qytetar posedon çfarëdolloj dëshmish, ato dëshmi t’ia parashtrojë prokurorisë kompetente publike dhe në atë mënyrë të ndihmojë në hetim”.

Këtë e theksoi ministri i Punëve të Brendshme, Oliver Spasovski në mbledhjen e sotme të Komisionit anketues kuvendar për skandalin në Klinikën për Onkologji, duke u përgjigjur në pyetje të deputetit për thëniet që i paraqiti dje kryetari i OBRM-PDUKM-së, Hristijan Mickoski për rastin, duke iu referuar raportimeve të informatorëve që e përfshijnë periudhën deri në gusht të këtij viti.

“Së pari, unë nuk mund të di dhe nuk duhet të di se cili dhe çfarë qëllime ka me sqarimin e çfarëdo lloj informatave. Nëse ekzistojnë dëshmi, dhe nuk i parashtron tek organet kompetente hetuese, do të thotë mbulim i dëshmive. Apo nëse ekzistojnë dëshmi, ndërkaq i publikon si dokumentacion që gjenden si pjesë e lëndës, kjo do të thotë kompromitim i dëshmive dhe tërë procedurës hetimore”, tha Spasovski.

Ministri Spasovski theksoi se për momentin nuk guxon dhe as nuk mund të paraqesë informata, të dhëna për atë se cilat dokumente janë marrë nga ana e MPB-së përmes urdhrit nga gjykata kompetente dhe prokuroria lidhur me tërë këtë proces.

Spasovski tha se ngjarjet për Onkologjinë filluan më 31 gusht 2023 kur për herë të parë nga ana e policisë së krimit, Sektorit për krim ekonomik dhe korrupsion është parashtruar njoftimi drejt PTHP-së dhe theksoi se ato zgjasin deri sot dhe do të zgjasin deri në përfundimin e tërë procedurës./Telegrafi/