Spalletti: Ishte zgjedhje e vështirë dhe e dhimbshme t’ia heqim shiritin Icardit, vendimi është për Interin

Interi ia ka hequr shiritin e kapitenit Mauro Icardit për ta bërë kapiten të parë portierin Samir Handanovic.

Ky vendim i klubit nuk është pritur mirë nga sulmuesi argjentinas i cili refuzoi të luaj ndaj Rapidit të Vjenës në Ligën e Evropës.

E për këtë ka folur trajneri i Interit, Luciano Spalletti, duke thënë se vendimi për t’ia hequr shiritin e kapitenit Icardit ka qenë i dhimbshëm.

“Ishte zgjedhje e vështirë dhe e dhimbshme nga ana jonë. Në dhomën e zhveshjes ia themi gjërat në sy njëri tjetrit. Vendimi nuk ka qenë kundër Icardit, por për Interin”.

Spalletti tregon se kanë pasur takim me Icardin dhe ia kanë thënë këtë gjë.

“Ne jemi takuar me Icardin dhe ia kemi thënë që nuk kemi asgjë kundër tij. Skuadra vije e para jo individi”, tha Spalletti.

Por sulmuesi argjentinas nuk do të grumbullohet as për takimin me Sampdorian, pasi sipas Spallettit ka një lëndim.

“Icardi për momentin ka një problem dhe nuk është në gjendje të luaj, gjithashtu edhe Keita do të mbetet jashtë”, u shpreh trajneri italian.

Mediat italiane në anën tjetër kanë filluar të shkruajnë rreth një largim të mundshëm të argjentinasit në verë.

Juventus dhe Chelsea janë dy skuadrat që po e kërkojnë me ngulm sulmuesin, ndërsa Inter për ta lënë të lirë kërkon që të paguhet klauzola e tij prej 110 milionë eurove. /Telegrafi/