Sot protesta e opozitës para Bashkisë Tiranë, policia publikon masat

Ditën e sotme pritet të mbahet protesta e radhës e organizuar nga Aleanca për Mbrojtjen e Teatrit para Bashkisë së Tiranës.

Protesta mbështetet nga grupimi i Sali Berishës dhe Partia e Lirisë dhe vjen pas arrestimit të disa ish-zyrtarëve të Bashkisë së Tiranës për korrupsion.

Ndërkohë Policia e Shtetit ka publikuar planin e masave për të siguruar mbarëvajtjen e tubimit.

Policia apelon që protestuesit të mos përdorin dhunë dhe thotë se do të ketë një bllokim të përkohshëm të kalimit në bulevardin kryesor pranë Bashkisë së Tiranës.

Njoftimi i Policisë:

Tiranë-Policia e Shtetit bën me dije se, ka marrë masa organizative dhe operacionale për garantimin e rendit publik dhe sigurisë gjatë zhvillimit të një tubimi të kërkuar nga “Aleanca për Mbrojtjen e Teatrit”, ditën e sotme, 7 maj 2024, ora 10:00, pranë Bashkisë së Tiranës.

Në zbatim të planit të masave, Policia e Shtetit njofton se, sot, prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerojmë që të përdoren rrugë alternative, deri në përfundim të tubimit, si Unaza e Mesme dhe Unaza e Madhe.

Gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime.

Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore.

Policia u përsërit thirrjen organizatorëve, drejtuesve dhe pjesëmarrësve në tubime për të respektuar ligjin dhe për t’u distancuar nga çdo akt dhune. /Telegrafi/