Si mundet Serie A që ta sigurojë vendin e gjashtë që e dërgon në Ligën e Kampionëve?

Tani është e konfirmuar se Atalanta, Bologna, Juventus, Milan dhe Interi janë kualifikuar për Ligën e Kampionëve 2024/2025, por është e mundshme që edhe një ekip tjetër t’i bashkohet atyre.

Atalanta mori tri pikët që i nevojiteshin me një fitore 2-0 në udhëtim ndaj Lecces, e cila i garantoi atyre pozitën e tyre në top pesëshe.

Ky është një rikthim në Ligën e Kampionëve pas një mungese prej tri vitesh për djelmoshat nga Bergamo, të cilët janë duke u bërë gati për finalen e Ligës së Evropës ndaj Bayer Leverkusenit.

Kjo do të thotë se Atalanta nuk mund të tejkalohet nga Roma ose Lazio, kështu që ekipet e konfirmuara që do marrin pjesë në Ligën e Kampionëve janë Interi, Milani, Juventusi, Bologna dhe Atalanta.

Lexo po ashtu Milani hap bisedimet me trajnerin që fitoi Kupën e Botës, por Fonseca është ende favorit

Sidoqoftë, është e mundshme që Italia të sigurojë edhe vendin e gjashtë, në një garë më të zgjeruar, por vetëm nëse kushte të caktuara plotësohen.

Ata kanë nevojë që Atalanta ta fitojë Ligën e Evropës më datë 27 maj, por gjithashtu të përfundojë në pozitën e pestë në ligë.

Nëse Atalanta arrin ta tejkalojë Bolognan ose Juventusin dhe të renditet në pozitën e katërt, atëherë triumfi në Ligën e Evropës do të bëhej i pavlefshëm.

Kjo për shkak se rregullat për një vend shtesë ishin caktuar para se të fillojë sezoni dhe ato i takojnë një ekipi i cili përfundon jashtë top katërshes në Serie A./Telegrafi/