Shtetet e Bashkuara vendosin sanksione ndaj sektorit të naftës në Iran

Shtetet e Bashkuara të Ameriksës kanë vendosur sanksione të reja të cilat shënjestrojnë kompanitë, entitetet dhe individët iranianë që janë kryesorë në sektorin e naftës.

Departamenti i Thesarit në SHBA, tha se përmes aktivitetit të tyre, të sanksionuarit, mbështesin Forcën Kuds, që është pjesa elite paramilitare dhe e spiunazhit e Trupave të Gardës Revolucionare Islamike.

“Regjimi në Iran përdor sektorin e naftës për të financuar aktivitetet destabilizuese të kësaj force. Ky regjim vazhdon të ketë në prioritet mbështetjen e tij për entitetet terroriste dhe programin e tij bërthamor”, tha sekretari i Thesarit, Steven Mnuchin.

Ndër të sanksionuarit janë Ministria Iraniane e Naftës, Kompania Kombëtare Iraniane e Naftës (NIOC) dhe Kompania Kombëtare Iraniane e Cisternave.

Sanksionet ngrinë çdo pasuri në Shtetet e Bashkuara të atyre që janë në listën e zezë dhe në përgjithësi ndalon amerikanët të bashkëpunojnë me të sanksionuarit.

Tensionet midis Washingtonit dhe Teheranit janë rritur që kur presidenti amerikan, Donald Trump u tërhoq në mënyrë të njëanshme më 2018 nga marrëveshja bërthamore me Iranin e arritur nga presidenti, Barack Obama më 2015.

Që atëherë, Shtetet e Bashkuara kanë rivendosur sanksionet që ishin lehtësuar në bazë të marrëveshjes, si dhe kanë shtuar disa të reja.

Sekretari amerikan i Shtetit, Mike Pompeo, ka thënë se sanksionet janë pjesë e një fushate presioni maksimal për të kufizuar aftësinë e regjimit iranian, për të kërcënuar fqinjët e tij dhe për të destabilizuar Lindjen e Mesme.

“Disa blerës të naftës iraniane duhet ta dinë se ata po ndihmojnë për të financuar veprimtarinë malinje të Iranit në të gjithë Lindjen e Mesme, duke përfshirë mbështetjen e tij për terrorizmin”, tha Pompeo në një deklaratë.

Sanksionet vijnë gjithashtu pasi Shtetet e Bashkuara javën e kaluar pretenduan se Irani ka ndërhyrë në fushatën e zgjedhjeve presidenciale të vitit 2020. Irani e quajti akuzën “të pabazë”. /REL/