Shkupi “shijon” humbjen pas 17 ndeshjeve, mundet nga Sileksi në Kratovë

Liderët e Superligës së Maqedonisë së Veriut, Shkupi kanë “shijuar” humbjen e parë pas 17 ndeshjeve, pasi sot u mundën në Kratovë nga Sileksi me rezultat 2-1 në ndeshjen e vlefshme për xhiron e 14-t.

Ekipi nga kryeqyteti e nisi mirë takimin në Kratovë, kur të parët shkuan në avantazh me golin e Trapanovskit në minutën e 12-të, mirëpo Sileksi përmbysi gjithçka në pjesën e parë. Fillimisht ishte Nikolic që barazoi shifrat përkohësisht në minutën e 17-të, teksa katër minuta para fundit të fraksionit të parë, Kalanoski realizoi edhe golin e dytë për skuadrën nga Kratova.

Në pjesën e dytë nuk kishte ndryshime në rezultat, përderisa Shkupi e mbylli ndeshjen edhe me një futbollist më pak në fushë, me mbrojtësin Ilieski që u ndëshkua me karton të kuq, pas asaj goditje me bërryl që i bëri Kalanoskit në një duel.

Ndërkohë në ndeshjen tjetër që ishte në program në kuadër të kësaj xhiroje, Rabotniçki mundi Makedonija Gjorçe Petrovin falë golit të Gandos të realizuar në minutën e 53-të.

Me përfundimin e këtyre dy ndeshjeve, mbyllet edhe xhiroja e 14-të në Superligën e Maqedonisë.

Kampionati elitar shkon në pauzë dy javore për shkak të ndeshjeve ndërkombëtare të ekipeve përfaqësuese në vijim, teksa kthehet me 26 nëntor me ndeshjet e xhiros së 15-të në program. /Telegrafi/