Shkolla ‘Zahir Pajaziti’, një model i përkushtimit për arsim cilësor në Podujevë

Në fshatin Orllan të Komunës së Podujevës gjendet Shkolla Fillore e Mesme e Ulët “Zahir Pajaziti”, me një histori të pasur që daton nga viti 1961, kjo shkollë ka formuar breza të tërë nxënësish.

Naim Bajrami, si ish-nxënës i kësaj shkolle, e tashmë drejtor,  ndan një lidhje të veçantë me këtë institucion, duke e parë si një vend që ka kontribuar thellësisht në formimin e tij dhe të shumë të tjerëve.

Nën drejtimin e tij, shkolla përqendrohet në ngritjen e cilësisë në arsim dhe për të krijuar një ambient më të mirë për nxënësit.

Në rrëfimin e tij për Telegrafin, ai u shpreh krenar se nxënësit e kësaj shkolle janë të dalluar duke u treguar të suksesshëm në mësimnxënie.

Ai thekson se është detyrë e tij dhe e stafit që të punojnë pa ndalesë për nxënësit, të bashkëpunojnë me prindërit dhe të angazhohen me komunën për të krijuar një ambient të favorshëm mësimor.

“Kemi një komunitet jashtëzakonisht të mirë. Shkolla jonë numëron mbi 200 nxënës, me një paralele të ndarë në Brainë. Ideja për foton e vjetër të shkollës është për shkak se unë kam qenë nxënës i asaj shkolle, ideja ka qenë për shkak të nostalgjisë, që edhe nxënësit ta shohin shkollën e vjetër”, tha ai.

Shkolla mban emrin e heroit Zahir Pajaziti, ndërsa drejtori tha se vetë heroi ka qenë nxënës i shkollës së vjetër, që ka qenë pak metra shkollës së re.

“Kontributi i tyre është i pamohueshëm, si nxënës shembullor, si luftëtar të Ushtrisë Çlirimtare të Kosovës”, tha ai, duke përmendur edhe luftëtarin Hajdin Haliti.

“Kemi edhe muzeun i cili është duke u pasuruar dita ditës, janë mësuesit që kanë vdekur, civilët, heroi Zahiri Pajaziti dhe Hajdin Haliti. Këtu është edhe ditari origjinal i Zahir Pajazitit dhe Hajdin Halitit. Unë krenohem me ketë muze”, tha ai.

Drejtori Bajrami tregoi se shkolla ofron gjithashtu laboratorë për biologji, kimi dhe fizikë, duke i dhënë nxënësve mundësinë të eksperimentojnë dhe të mësojnë në mënyrë praktike.

Ideja për arkivin e shkollës është një tjetër nismë që Bajrami thotë se e ka bërë për të ruajtur historinë dhe arritjet e shkollës.

Ndërsa, Valbona Ibishi Azemi, arsimtare në shkollën “Zahir Pajaziti”, thekson se nxënësit në këtë zonë rurale janë të motivuar për lexim.

“Nxënësit në këtë pjesë rurale janë shumë të interesuar për lexim, ndoshta për shkak të mungesës së teknologjisë në zonën e tyre. Ata tregojnë një angazhim më të madh për librat sesa fëmijët në pjesë të tjera, ku teknologjia është më e pranishme. Një pjesë e madhe e leximeve përfshin libra për vizatim dhe për zhvillim të përgjithshëm. Këta fëmijë janë të edukuar dhe përfaqësojnë një shembull pozitiv për kohën e sotme”, tha ajo.

Një nga mesazhet kryesore të drejtorit Bajrami është se shkolla duhet të jetë e lirë nga politika.

Ai beson se përqendrimi në edukim dhe zhvillimin e nxënësve duhet të jetë prioriteti i parë, dhe se çdo ndërlikim politik vetëm sa e pengon këtë proces.

“Drejtorët duhet të punojnë natë e ditë për nxënësit, si dhe të bashkëpunojnë me prindërit, komunën dhe të gjithë faktorët relevantë, për të ngritur shkollat dhe për t’i bërë ato më të mira”, potencoi ai./Telegrafi/