Shkaku i sanksioneve amerikane, shumica e aeroplanëve rus Airbus janë jashtë funksionit

Më shumë se gjysma e aeroplanëve Airbus A320/A321neo që operojnë në Rusi janë aktualisht jashtë shërbimit për shkak të motorëve, një problem i rënduar nga sanksionet ndërkombëtare që kufizojnë mundësitë e mirëmbajtjes dhe riparimeve.

Kjo situatë përfaqëson një sfidë të madhe për industrinë ajrore në Rusi, duke ndikuar ndjeshëm në kapacitetet operacionale të kompanive ajrore.

Kompania S7 Airlines, një nga operatorët më të mëdhenj në vend, është goditur rëndë nga kjo situatë. Nga flota e saj prej 39 aeroplanësh Airbus A320/A321neo, 31 janë jashtë përdorimit, shkruan gazeta e pavarur ruse kommersant.

Problemi kryesor qëndron te motorët Pratt & Whitney, të cilët kërkojnë riparime që mund të kryhen vetëm në Shtetet e Bashkuara. Megjithatë, për shkak të sanksioneve të vendosura pas pushtimit të Ukrainës, dërgimi i këtyre motorëve jashtë vendit është bërë i pamundur, duke lënë aeroplanët të papërdorshëm për një kohë të pacaktuar.

Nga ana tjetër, Ural Airlines ndodhet në një situatë pak më të favorshme, pasi flota e saj është e pajisur me motorë nga prodhuesi CFM. Për këta motorë, pjesët e këmbimit ende mund të importohen, megjithëse me vështirësi dhe kosto të lartë.

Pavarësisht kësaj, edhe kjo kompani është detyruar të nxjerrë disa aeroplanë jashtë shërbimit dhe t’i dërgojë në magazinim për shkak të mungesës së mundësive për mirëmbajtje të plotë.

Ekspertët e industrisë paralajmërojnë se, pa një zgjidhje për riparimin dhe furnizimin me pjesë këmbimi, aeroplanët Airbus neo të përdorur në Rusi do të përballen me çmontim masiv deri në vitin 2026.

Kjo do të ndikonte jo vetëm në kapacitetet e fluturimeve të brendshme dhe ndërkombëtare, por edhe në ekonominë e përgjithshme të transportit ajror në vend. Përballë këtyre sfidave, disa kompani po kërkojnë alternativa si blerja e pjesëve në tregun gri ose përpjekjet për të zhvilluar kapacitete vendase për riparimin e motorëve – një proces i gjatë dhe teknikisht sfidues. /Telegrafi/