Serbia thuhet se ka porositur mijëra dronë nga Irani, një vend që është nën sanksione

Një delegacion i Ministrisë së Punëve të Jashtme të Serbisë vizitoi Teheranin dhe porositi 20,000 drone Shahed-136 në bashkëpunim me Teheranin, duke thënë se “nuk ka pengesa për përmirësimin e marrëdhënieve”.

Siç kujtojnë mediat e huaja, përcjell Telegrafi, në dy vitet e fundit, Irani ka armatosur Rusinë, Armeninë dhe Serbinë.

Goran Aleksiq, zëvendësministër i Punëve të Jashtme i Serbisë, i cili udhëhoqi delegacionin serb në Teheran për raundin e dytë të konsultimeve politike me Iranin, u takua të dielën pasdite me zëvendësministrin e Punëve të Jashtme të Republikës Islamike të Iranit për Çështjet Politike, Ali Bagheri.

Siç thuhet më tej, Irani ka treguar ambicie për të zgjeruar ndikimin e tij në Ballkan dhe ka gjetur Serbinë si partner.

Irani synon sektorin e sigurisë për t’i shitur armë Serbisë, shkruan thegeopost.com.

Sipas njoftimit të ministrisë iraniane, Bagheri e cilësoi si domosdoshmëri promovimin e bashkëpunimit tregtar ndërmjet Iranit dhe vendeve të Ballkanit, veçanërisht Serbisë.

Ndërkohë, zëvendësministri i Serbisë tha se ishte në Iran për të përmirësuar marrëdhëniet Teheran-Beograd. Ai tha se politika e qeverisë serbe është që të zhvillojë marrëdhëniet me vendet mike, veçanërisht me Iranin, në të gjitha fushat.

Siç thuhet më tej, Serbia ka dështuar të ndjekë politikat e shteteve perëndimore në lidhje me këtë vend.

Kështu, ky vend ndjek strategjinë e Rusisë për blerjen e armëve nga Irani, një veprim i dënuar dhe sanksionuar nga bota perëndimore dhe kundër agresionit rus në Ukrainë. /Telegrafi/