SEGA tërheq disa lojëra nga iOS dhe Android

Nëse jeni të pasionuar pas lojërave, atëherë me siguri se e njihni emrin Sega. Kompania japoneze e krijimit të lojërave ka lajmëruar sot se do të heq disa nga lojërat e saj nga dyqanet e aplikacioneve mobile.

Ky vendim do të ndikoj tek lojërat e distribuara online në dyqanet e Apple, Google, Amazon dhe Samsung.

Sipas GeekyGadgets, kompania japoneze ende nuk ka njoftuar se cilat lojëra do të tërhiqen nga tregu, gjë që pritet të ndodhë në ditët vijuese.

Zyrtarët e kompanisë "Sega" kanë vlerësuar listën e lojërave të tyre online, dhe disa prej tyre janë konsideruar si të pa vlera sipas standardeve matëse të kompanisë.

Në rast se keni paguar për ndonjërën nga lojërat e "Sega", ju do të jeni ende në gjendje t’i luani ato, mirëpo të njejtat mund të mos jenë në dispozicion në sistemet e ardhshme operative.

Përderisa flitet për standarde, mund të konkludohet që kompania po provon ta rrisë kualitetin, duke e zvogëluar sasinë e listës së lojërave të saj që mund të luhen nga pajisjet mobile. (Telegrafi)