Seancat e mbyllura të Speciales ngjallin dyshime në opinionin publik

Monitoruesit e procesit gjyqësor në Gjykatën Speciale, si dhe bashkëluftëtarët e ish krerëve të UÇK-së që po gjykohen në Hagë e kanë kritikuar vendimin e trupit gjykues për seancat private të vazhdueshme gjatë dëshmive të dëshmitarëve të prokurorisë së specializuar.

Monitoruesit e procesit gjyqësor në Gjykatën Speciale, si dhe bashkëluftëtarët e ish krerëve të UÇK-së që po gjykohen në Hagë e kanë kritikuar vendimin e trupit gjykues për seancat private të vazhdueshme gjatë dëshmive të dëshmitarëve të prokurorisë së specializuar

Një javë plot me seanca gjyqësore ka qenë në Dhomat e Specializuara, por me shumë pak informacione për publikun rreth deklarimeve aty.

Gjykata Speciale po e vazhdon avazin e mos transparencës në seanca, duke i mbajtur private pjesën më të madhe të tyre.

Njëjtë ndodhi edhe në seancën e fundit të Pjetër Shalës e asaj ndaj Thaçit dhe të tjerëve, bile për këtë të fundit ka ankesa bashkëluftëtari i ish-krerëve të UÇK-së.

Arif Aliu thotë se nuk e di çfarë po dëshmojnë dëshmitarët e prokurorisë.

Lexo po ashtu Përfundon seanca, gjykimi ndaj Thaçit dhe të tjerëve vazhdon me 15 maj

“Edhe del fol diçka zi e askush nuk e merr vesh, na nuk e dimë çka po thonë ata. Po dua me ditë edhe unë çka po thotë ai dëshmitar, ndoshta jam dëshmitar i asaj pune, dua me ditë apo fol drejt a po gënjen. Kjo që po ndodh me mbylljen e seancave neve na mundon”, ka thënë Aliu.

Por përveç publikut, të mangëta informacionet i kanë edhe ata që e monitorojnë punën e Speciales.

Amer Alija nga Fondi për të Drejtën Humanitare thotë se opinioni ka nevojë të dëgjojë dëshmitë, që në fund të aktgjykimit të kuptojë nëse vendimi, çfarëdo qoftë ai, ka qenë meritor.

“Edhe monitoruesit e kanë problem të kuptojnë se çka është duke ndodhur në të vërtete brenda seancës, unë mendoj se trupi gjykues duhet të kujdeset që informatat që lidhen me identitetin e dëshmitarit apo familjarëve të tij të mos transmetohen, ndërkaq pjesa tjetër e dëshmisë që nuk ndikon në identifikimin e tij, të jetë e hapur për publikun”, ka thënë Alija.

Nga ana tjetër në Institutin e Kosovës për Drejtësi thonë se duhet të ndiqet një proporcionalitet, me ç’rast shpjegohet se çka rrezikohet nëse seancat mbahen publike dhe jo të fshehura për audiencën.

“Në secilin rast nuk mund të shkohet me vlerësime ndoshta abstrakte sa i përket mbylljes së seancave, mirëpo në secilën rast duhet të specifikohet, se mbajtja publike e seancës çka rrezikon. Për shkak se gjykimi publik është njëra nga komponentët kryesore edhe të gjykimit të drejtë në bazë të konventës evropiane për të drejtat  e njeriut dhe kushtetutës së Kosovës”, ka thënë Shala.

Pas më shumë se dy vjetësh në paraburgim, gjykimi ndaj ish-krerëve të UÇK-së ka filluar më 3 prill. Për muajin maj janë paraparë të zhvillohen dhjetë seanca.