San Francisko anulon vendimin që policia të përdorë ‘robotët vrasës’

Autoritetet e San Franciskos kanë anuluar një vendim që lejonte policinë lokale të përdorë robotë që mund të vrasin njerëz.

Vendimi rezultoi pas kritikave të ashpra nga grupet civile që kundërshtuan përdorimin e robotëve, që në skenarët ekstremë kanë aftësinë për të vrarë të dyshuarit.

Me votën e së martës u vendos “pauzimi” i vendimit dhe kryerja e analizave shtesë, transmeton Telegrafi.

Votimi erdhi pasi një ligj i ri u prezantua në Kaliforni, që lejon policinë e qytetit të mbajë pajisje ushtarake, por duhet të kërkojë leje për t’i përdorur ato.

Dr. Catherine Connolly nga grupi Stop Killer Robots, tha për BBC se licencimi i robotëve ishte një “terren i rrëshqitshëm”.

Demonstruesit dhe zyrtarët që kundërshtuan vendimin, u mblodhën në shkallët e bashkisë dhe kërkuan tërheqjen e vendimit. Gjatë votimit të dytë, vendimi i diskutueshëm u tërhoq.

Projektligji origjinal tani do të ndryshohet ose refuzohet tërësisht.

Nga ana tjetër, policia pretendonte robotët do të përdoreshin vetëm në rrethana ekstreme. Ata do të mund të pajiseshin me lëndë shpërthyese për të “thyer strukturat e fortifikuara që strehojnë subjekte të dhunshme, të armatosur ose të rrezikshëm”.

Gjithashtu, robotët do të përdoreshin për “paaftësimin e të dyshuarve të dhunshëm, të armatosur dhe të rrezikshëm që paraqesin rrezik për jetën”. /Telegrafi/