Rucker: Kosova duhet t’i përmbush kushtet për liberalizimin e vizave

Ish-kryeadministratori i UNMIK-ut në Kosovë, Joachim Rucker, ka thënë se Kosova është duke ecur në rrugë të duhur drejt Bashkimit Evropian.

Rucker në një intervistë për KosovaPress ka thënë se shteti i Kosovës ka pasur përmirësime në infrastrukturë, ndërsa pret që të ketë përmirësime edhe në sektorin e energjisë.

“Për aq sa mund të vërej gjërat po ecin në drejtim të duhur. Jam shumë i lumtur që me rastin e kësaj vizite kam parë përmirësime në infrastrukturë dhe mendoj që në fushat tjera duhet të ketë përmirësime të mëtutjeshme duke përfshirë kështu sektorin e energjisë. Jam shumë pozitiv që Kosova është në drejtimin e duhur dhe eventualisht do të jetë anëtare e BE-së, siç e kemi thënë edhe vite më parë”, tha Rucker.

I pyetur lidhur me vendimin e institucioneve të Kosovës për ndryshimin e misionit të Forcës së Sigurisë së Kosovës, që e çon atë drejt krijimit të ushtrisë, Rucker pa komentuar shumë për këtë temë tha se Kosova momentalisht është në një proces të dialogut që mbikëqyret nga faktori ndërkombëtar, e i cili e “këshillon Kosovën lidhur me këtë çështje”.

“Nuk jam ekspert sa i përket kësaj pyetje sepse unë nuk jam më i angazhuar në politikën e brendshme të Kosovës, por  ju jeni në një dialog të mbikëqyrur nga komuniteti ndërkombëtar, i cili iu këshillon lidhur me këtë çështje”, tha ish-administratori gjerman.

Duke folur në lidhje me liberalizimin e vizave për qytetarët e Kosovës, Rucker përmendi kushtet që kosovarët duhet të përmbushin për të lëvizur lirshëm nëpër shtetet e BE-së.

Me këtë rast ish-administratori i UNMIK-ut tha se Kosova duhet t’i përmbush kushtet që i janë caktuar për liberalizim të vizave.

“E di që duhet të plotësohen disa kushte dhe disa kërkesa për liberalizimin e vizave dhe do ta këshilloja Kosovën që ta bëjë këtë gjë dhe të plotësoj kërkesat dhe jam i sigurt që në këtë mënyrë gjërat mund  të ndodhin”, tha Rucker.

Diplomati nga Gjermania ka qenë në krye të UNMIK-ut në Kosovë prej vitit 2006 deri në vitin 2008.