Rrëfimi unik i Arbër Zenelit për skuadrat që e kërkonin: Chelsea është interesuar shumë, për Ajaxin do të udhëtoja në këmbë deri në Amsterdam

Arbër Zeneli ka qenë i ftuari i radhës i gazetarit Romak Zeqiri në faqen zyrtare të redaksisë së sportit së Telegrafit në Instagram.

Njëri nga futbollistët më të mirë të Kosovës ka folur gjerë e gjatë për karrierën e tij, por edhe për jetën private.

Djaloshi nga Mitrovica ka folur edhe për interesimin e shumë skuadrave gjatë afatit kalimtar të janarit në vitin 2019, para se të kalonte në Reims.

Zeneli ka konfirmuar për Telegrafin se gjiganti anglez Chelsea ishte interesuar shumë për transferimin e tij.

“Ka pasur interesim të madh nga Chelsea dhe kjo gjë më bënte mua krenar. Chelsea u interesuar shumë, por në fund nuk erdhi ajo oferta zyrtare që pritke Heerenveeni dhe unë dhe kësisoj iu bashkova Reimsit”, deklaroi Zeneli për Telegrafin.

Vitin e kaluar ishin mediat holandeze që raportonin për interesimin e Ajaxit për yllin kosovar.

25-vjeçari thotë se sa i përket Ajaxit nuk ka pasur ofertë zyrtare, pasi nëse do të ishte një gjë e tillë do të nisej në këmbë për në Amsterdam.

“Ka pasur raportime për interesimin e Ajaxit, por ofertë zyrtare jo. Nëse do të më kërkonte përnjëmend Ajaxit do të nisesha në këmbë për në Amsterdam”, deklaroi duke qeshur Zeneli për Telegrafin.

Reprezentuesi kosovar iu bashkua skuadrës franceze Reims për katër milionë euro në janarin e vitit të kaluar. /Telegrafi/

https://www.instagram.com/p/B_MmZU8lkmR/