Ronaldo kthehet në Mançester që të bisedojë për të ardhmen e tij, do të ketë një takim të veçantë me Ten Hag

Cristiano Ronaldo do të qëndrojë në Angli për të mbajtur takime me përfaqësues të Manchester Unitedit lidhur me të ardhmen e tij – mëson The Athletic.

Superylli portugez akoma nuk është angazhuar nën drejtimin e trajnerit Erik ten Hag, pasi ka munguar në turneun parasezonal në Tajlandë dhe Australi, për – siç është thënë – arsye familjare.

37-vjeçari do të qëndrojë në Mancester për të biseduar me klubin rreth të ardhmes së tij, ndërsa veçmë e ka njoftuar se dëshiron të largohet në verë nëse vjen ndonjë ofertë e përshtatshme.

Qëndrimi i Djajve të Kuq është se Ronaldo nuk është në shitje dhe se ai do të jetë pjesë e rëndësishme e skuadrës në sezonin 2022/2023.

Është e paqartë në këtë fazë, nëse ai do të stërvitet me skuadrën të martën, por do të ketë edhe bisedë ballë për ballë me trajnerin në ditët në vijim.

Lexo po ashtu Deklarata e fundit e Tuchelit - shpresë për kalimin e Ronaldos te Chelsea

Kthimi i Cristianos po shikohet si shenjë pozitive nga Unitedi duke i rritur gjasat për qëndrim, megjithëse ka mungesë qartësie lidhur me këtë situatë.

Portugezi ka edhe 12 mua në kontratën që e nënshkroi kur iu ribashkua klubit në verën e kaluar nga Juventusi, ndërsa ekziston edhe opsioni i vazhdimit për një vit, për të cilin Ten Hag beson se mund të aktivizohet.

Ronaldo ishte golashënuesi më i mirë i skuadrës në edicionin e kaluar me 24 gola në të gjitha garat, mirëpo mospjesëmarrja në Ligën e Kampionëve dhe mungesa e përkushtimit për trofe, ka bërë që ai të kërkojë një klub tjetër. /Telegrafi/