Rifillojnë punimet për restaurimin e ish-gjimnazit në Ferizaj, që u dogj ditë më parë

Kanë rifilluar punimet për restaurimin e objektit të ish-gjimnazit të vjetër “Ismail Qemali” në Ferizaj, i cili ditë më parë u përfshi nga zjarri.

Lajmin e ka bërë të ditur ministri i Kulturës, Rinisë dhe Sportit, Hajrulla Çeku, i cili ka thënë se pas intervenimit të zjarrfikësve kanë bërë vlerësimin e dëmeve.

Lexo po ashtu Ish-gjimnazi që u dogj në Ferizaj kishte nisur të rinovohej, reagon komuna: Do ta mbrojmë objektin

Tutje, ai ka shtuar se më pas kanë mobilizuar të gjitha kapacitetet për t’i mbyllur procedurat e nevojshme.

“Me 13 mars patën nisur punimet për restaurim. Në mëngjesin e hershëm të 14 marsit ndërtesës iu vu zjarri. Disa ditë zgjati angazhimi i zjarrfikësve. Pasi na u mundësua qasja, bëmë vlerësimin e dëmeve”, ka shkruar Çeku në Facebook.

“I mobilizuam të gjitha kapacitetet për t’i mbyllur procedurat e nevojshme. Sot, vetëm 10 ditë pas zjarrvënies, punimet kanë rifilluar. Shkolla e parë shqipe (gjimnazi i vjetër) “Ismail Qemali” në Ferizaj do të restaurohet”.

Ndryshe, ministri Çeku e pati quajtur krim djegien e këtij objekti, teksa pati deklaruar se do të restaurohet, “i pëlqeu apo jo keqbërësve”. /Telegrafi/