Lajme Shqipëri

Rama vlerëson punën e Janullatos për ringjalljen e besimit: Erdhi si një prift nga Greqia, largohet si Anastasi i Shqipërisë

Para 9 ore

Gjatë fjalës në ceremoninë e lamtumirës së Anastas Janullatos, Kryeministri Edi Rama lavdëroi punën e Kryepeshkopit për ringjalljen e besimit dhe ribashkimin e besimtarëve në Shqipëri pas rënies së komunizmit.

“Plot 33 vite ungjizim në viset e Shqipërisë, janë një shifër tejet domethënëse dhe jo vetëm pse përputhen me moshën e Jezu Krishtit. Jeta e Anastas Janullatosit ishte tërësisht e përmbushur, përderisa përmes saj u realizua ëndrra e një fëmije. “Kur isha fëmijë, kujtonte kryepeshkopi i ndjerë, nuk doja të bëja diçka për zotin, por t’i jepesha tërësisht atij”…”, tha Rama në fjalën e tij.

Ai shtoi se pavarësisht se figura e tij disa herë edhe u anatemua, për shkak të konflikteve mes Shqipërisë dhe Greqisë, askush nuk mund të mohojë rolin e tij në ringritjen e Kishës Ortodokse në Shqipëri.

“Personi i Kryepeshkopit Anastas dhe vepra e tij në krye të Kishës janë qëmtuar, admiruar, bekuar e qortuar e deri edhe janë anatemuar. Pasionet më kontradiktore janë shfaqur në mexhlisin tonë kur ka ardhur puna te veprimtaria publike dhe qytetare e njeriut i cili deshi apo s’deshi mori mbi supe deri dhe zjarret e konflikteve fëmijërore të fqinjësisë sonë, të ringjallur në të njëjtën kohë me ringjalljen e Kishës. Por edhe kjo, më së paku dëshmon për stoicizmin e bariut, cilësi gjithnjë e më e rrallë në një botë ku gjithnjë e më shumë janë ata që frynë andej nga fryn era. Por përtej zjarreve andej e këndej kufirit pas gjysmë shekulli heshtjeje mortore, askush dhe asnjëherë nuk e vë dot në dyshim, autenticitetin e angazhimit baritor të Kryepeshkopit, për grigjën që e gjeti të vrarë, të plagosur dhe të shpërndarë 33 vite më parë dhe që e bashkoi me përkushtim e durim të madh”, tha Rama.

“Ai erdhi në Shqipëri si një prift nga Greqia, por largohet si Anastasi i Shqipërisë. E di që ka plot shqiptarë që nuk pajtohen me këtë që thashë, por durim…”, shtoi Rama.

Rama kujtoi edhe bisedat e bëra me Janullatos, ku ky i fundit i tregonte për problemet e Kishës.

“Me trupin që la këtu në tokën e Shqipërisë, do të varroset në këtë katedrale, siç e quajti, ngjallje njësoj siç kishte edhe vetë emrin e tij. Në këtë mbylljen e ciklin të kushtuar ngjalljes, duhet thënë se në përmasën e vetme që i interesonte atë të fesë, Anastasi erdhi mes nesh 33 vjet më parë si një prift, dhe ndahet nga mesi ynë si Anastasi i Shqipërisë.

Duhet pranuar se është vështirë shumë vështirë të gjendet në kujtesën tonë dikush i çfarëdo kombësie tjetër të jetë identifikuar me aq krenari dhe përkushtim me fjalë dhe vepra, sa Anastasi. E di që ka plot shqiptarë që nuk pajtohen me këtë që thash, por durim. Kishë e lirë në një shtet të lirë.

Pohimi i tij i dhënë për shtypin grek që tingëllon më shqip se vetë shqipja…

Tha pasuesi im do të jetë shqiptar, kam që në ‘63 që udhëtoj nëpër botë kam mësuar ta respektoj tjetrin ashtu siç është.

A do ta pranonin të drejtonin kishën e Greqisë një bullgar, e konsideroi të mirëqenë që duhet shqiptarë në vendin tonë.

Ne nuk shkuam për të bërë koloni, por Kishë Autoqefale. Ajo është një nga 14 kishat Ortodokse Qefale të botës, e mbyll fjalën e tij Kryepeshkopi ynë. Më kujtohet kur flisnin dhe më qante hallet e kishës… Çfarë njeriu dhe pajtuesi paqebërës. Çfarë greku në kombësi dhe çfarë shqiptari në shtetësi”, deklaroi Rama. /Telegrafi/