Qeveria për takimin në Bruksel: Serbia refuzoi planin e sekuencimit dhe e sabotoi diskutimin për të zhdukurit

Qeveria e Kosovës ka dhënë detaje për takimet e sotme të kryenegociatorit Besnik Bislimi, që pati me emisarin special të dialogut, Miroslav Lajçak dhe kryenegociatorin serb, Petar Petkoviq.

Siç njoftohet, në takimet e sotme u fol mbi formalizimin e Marrëveshjes Bazike, ku sipas tyre, është element kryesor dhe i parë për zbatim të sekuencuar të marrëveshjes, bashkë me Aneksin e Ohrit, mbi Planin e Sekuencimit, Zbatimin e Marrëveshjes së Energjisë, rreth mungesës së përparimit në zbatimin e Deklaratës për personat e zhdukur me dhunë si dhe zbatimin e një numri marrëveshjesh të tjera, përfshirë IBM-in si dhe atë për vizitat zyrtare.

“Nga diskutimet, sidomos në dy pikat e para, u ekspozua sërish fakti tashmë i konfirmuar disa herë dhe publikisht që Serbia refuzon të pranojë Marrëveshjen Bazike në tërësi dhe nuk pranon të zbatojë pjesë të saj”.

Lexo po ashtu Lajçak pas takimit në Bruksel: U dakorduam për një sërë hapash

“Pala serbe refuzoi të përfshihet në diskutim për dakordimin e planit të sekuencimit si dhe në arritjen e formalizimit të marrëveshjes, bazuar në garancat e kërkuara në takimin e liderëve javën e kaluar. Diskutimi rreth çështjes së personave të zhdukur ekspozoi sërish që pala serbe është duke e sabotuar procesin, duke nxjerrë vazhdimisht kërkesa të reja me qëllim të bllokimit të procesit”, thuhet në njoftimin e qeverisë.

Më tej, qeveria tha se Bislimi evidentoi në takim edhe zvarritje në zbatim të Marrëveshjes së Energjisë, teksa qeveria insistoi se Marrëveshja Bazike, pikë fillestare duhet ta ketë formalizimin e marrëveshjes mes palëve.

“Takimi i sotëm, që zgjati më shumë se 6 orë, nisi me takime bilaterale, ndërsa u përmbyll me atë trilateral. Vazhdimi i procesit mbetet tek përpjekja për të gjetur rrugën përpara në arritjen e dakordimit rreth formalizimit dhe planit të sekuencimit për zbatimin e plotë të Marrëveshjes Bazike të cilën BE-ja e ka shpallur si ligjërisht të obligueshme në tërësinë e saj dhe aneksit të zbatimit, që pikë filletare duhet ta ketë formalizimin e marrëveshjes mes palëve”, thuhet në njoftim.