Qeveria Austriake konfirmon se pati planifikim të një sulmi terrorist në koncertet e Taylor Swift në Vjenë

Taylor Swift ka anuluar tri koncertet e saj të ardhshme në Vjenë, Austri pasi dy të dyshuar u arrestuan për organizim të dyshuar për një sulm terrorist.

I dyshuari kryesor 19-vjeçar u arrestua në Ternitz, në jug të Vjenës, dhe personi i dytë në kryeqytetin austriak – sipas Franz Ruf, drejtori i përgjithshëm për sigurinë publike në Ministrinë e Brendshme.

Ylli i popit, 34 vjeçe, do të performonte në ‘Ernst-Happel-Stadion’ të Vjenës në tri koncerte më 8, 9 dhe 10 gusht dhe masat e sigurisë për shfaqjet ishin vendosur të rriteshin – përpara anulimit, shkruan DailyMail.

Të dyshuarit – të cilët dyshohet se u radikalizuan në internet – po planifikonin të synonin Vjenën në sulmin e tyre – me 19-vjeçarin ‘të fokusuar’ në koncertin e Swiftit në Vjenë, konfirmoi Ruf.

19-vjeçari – i cili jetonte në shtëpinë e prindërve së bashku me një burrë tjetër – u arrestua të mërkurën pasi policia bastisi shtëpinë, sipas gazetës austriake “Kronen Zeitung”.

Një skuadër bombash thuhet se gjeti substanca kimike pas bastisjes së shtëpisë – dhe substancat tani po vlerësohen për të parë nëse ato mund të prodhojnë një bombë.

Emrat e të dyshuarve nuk janë bërë të ditur ende.

Adoleshenti kishte premtuar një betim për besnikëri ndaj grupit të Shtetit Islamik (ISIS) në fillim të korrikut – tha policia dhe konfirmoi se ishin në dijeni të ‘veprimeve përgatitore’ për një sulm të mundshëm.

Burime të zbatimit të ligjit thanë për ABC News se informacioni për kërcënimin ndaj shfaqjeve kishte origjinën nga inteligjenca amerikane dhe iu kalua austriakeve dhe Europolit.

Ruf shtoi: “Të dyshuarit ishin të fokusuar në koncertet e Taylor Swift. Ne zbuluam se ai po ndërmerrte veprime për t’u përgatitur për sulmin. Një kërcënim i qartë është shmangur.’

Policia po heton edhe bashkëpunëtorët e tjerë të mundshëm.

Promovuesi i koncertit të Swift, Barracuda Music postoi një deklaratë ku shkruhej: “Taylor Swift | Koncertet e turneut ‘Eras’ në Vjenë janë anuluar për shkak të konfirmimit të zyrtarëve qeveritarë për një sulm të planifikuar terrorist.

“Me konfirmimin e zyrtarëve qeveritarë për një sulm të planifikuar terrorist në stadiumin Ernst Happel, ne nuk kemi zgjidhje tjetër veçse të anulojmë tri shfaqjet e planifikuara për sigurinë e të gjithëve.

“Të gjitha biletat do të rimbursohen automatikisht brenda 10 ditëve të ardhshme të punës”.

Koncertet pritej të ndiqeshin nga 65,000 spektatorë në ditë, me një shtesë prej 10,000 deri në 15,000 fansa jashtë zonës, tha policia.

Një sulm vetëvrasës me bombë i kryer nga Salman Abedi, 22 vjeç, ndodhi më 22 maj 2017 në një koncert të Ariana Grandes në Manchester Arena – dhe rezultoi në vdekjen e 22 viktimave dhe 139 të plagosurve.

Pas sulmit, Ariana ndërpreu turneun e saj, por u kthye në qytet vetëm dy javë më vonë për të kryesuar koncertin ‘One Love’ në qershor 2017.

Turneu “Eras” i Taylor Swift do të përfundojë në Vankuver, Kanada, më 8 dhjetor. /Telegrafi/