Qendrat e Mjekësisë Familjare në Prishtinë pa shërbime të pastrimit nga punëtorët teknikë

Rreth 120 punëtorë teknikë të sektorit privat në Qendrat të Mjekësisë Familjare (QMF) që nga e hëna nuk janë duke punuar për shkak se kompanisë i ka përfunduar kontrata, e kontraktuar më parë nga Komuna e Prishtinës.

Kështu tha në një prononcim për Telegrafin kryetari i Sindikatës së punëtorëve të sektorit privat, Jusuf Azemi.

Sipas tij, punëtorët teknikë nuk do të punojnë pa u kontraktuar kompania në fjalë, apo ndonjë kompani tjetër.

“Që nga dje kompanisë e cila ka qenë deri tash e angazhuar për të kryer shërbime në QMF i ka përfunduar kontrata. Ligjërisht ose t’i vazhdohet kontrata asaj kompanie ose të gjendet ndonjë kompanie e re. Këto janë vonesa që i ka bërë vetë Komuna e Prishtinës, dhe tani ne jemi në një pozicion që më nuk do të punojmë për asnjë sekondë deri sa të nënshkruhet kontrata e re…”, ka thënë Azemi.

Ai po ashtu tregoi se QMF-të në Prishtinë kanë nevojë për më shumë punëtorë teknikë, për shkak të intensitetit të punës në këto klinika.

“Edhe kur i kemi pas të gjithë punëtorët duke i kryer punët e tyre shpeshë herë nuk kemi mundur që t’i dalim në skej, pasi kemi pas shumë. Ai që ka guxu me i lënë QMF-të në këtë gjendje po e rrezikon dhe Prishtinën”, u shpreh ai.

Ai po ashtu tha se kontraktimi i ndonjë kompanie është nën kompetencë të  Komunës së Prishtinës duke thënë se “në një shtet normal mos kontraktimi i kompanisë për shërbimet e pastrimit në QMF nuk guxon të ndodh”.

E, siç u shpreh ai, pacientët që shkojnë për shërbime shëndetësore mund të marrin edhe ndonjë infeksion.

“Para dy-tri jave jemi pajtu që paga e punëtorit të jetë 402 euro…tani kjo që po ndodh në Komunën e Prishtinës nuk është në kompetencat tona dhe ne nuk kemi nevojë të bisedojmë me ta, pasi këto nuk janë detyrat tona. Për ne nuk është me rëndësi kush e fiton nga kompanitë… Për momentin në QMF-të në Prishtinë nuk ka shërbime, nuk ka pastërti. Pacientët në vend që të marrim mjekimin e tyre duke ruajtur shëndetin e tyre, ata mund të ndodh që do të marrin ndonjë infeksion”, tha ndër të tjera, Azemi. /Telegrafi/