Punonjësja braziliane humb jetën kur mbi të përfunduan raftet gjigante – gjithçka filloi të shembet sikur të ishin kulla prej letre

Punonjësja e një marketi ka humbur jetën, kur raftet me mallra të ndryshme u shembën brenda lokalit në qytetin brazilian Sao Louis.

Në momentin kur në market ishin më shumë se 60 konsumatorë dhe mbi 20 të punësuar, në mënyrë të befasishme një prej rafteve të shumta filloi të lëkundet, transmeton Telegrafi.

E personi që ishte më së afërti raftit filloi t’i bërtet masës që të largohen. Gjithçka u zhvillua shpejt, dhe raftet tjera filluan të shemben sikur të ishin kulla të punuara nga letra, transmeton Telegrafi.

Bëhet fjalë për raftet mbi 15 metra të lartë që ranë dhe shumë klientë dhe punonjës mbetën të ngujuar nën ta, e një punonjëse e identifikuar si Elane de Oliveira Rodriguez, 21-vjeçe, humbi jetën – derisa 9 tjerë u lënduan.

Policia është duke hetuar rastin dhe besohet se pesha e madhe e mallrave ka bërë që ato të shemben, dhe të përfundojnë mbi kokat e personave që ishin brenda marketit.

Operacioni për shpëtimin e të ngujuarve ka zgjatur më shumë se 11 orë, ku kanë marrë pjesë rreth 270 zjarrfikës. /Telegrafi/