Zbulohen detaje dhe pamje të vjedhjes nga grupi kriminal serb “Pink Panther” në një argjendari në Greqi – bie në sy një detaj

Shtetas të Serbisë, të moshës 50 dhe 53 vjeç, u arrestuan të mërkurën në Greqi, të dyshuar për grabitjen e të paktën dy dyqaneve të argjendarisë në zonën e Athinës.

Sipas mediave serbe, përcjell Telegrafi, anëtarët e grupit kriminal “Pink Panther” besohet se janë arrestuar dhe kamerat e sigurisë së një prej bizhuterive të grabitura kanë kapur momentin kur i dyshuari heq nga vitrinat bizhuteritë me vlerë.

Të arrestuarit dyshohen se kanë grabitur të paktën dy dyqane bizhuterish në qendër të Athinës që nga dhjetori i vitit 2023.

Një detaj që ka rënë në sy është se ata zgjodhën ato dyqane bizhuterish që ndajnë një mur me ndonjë ndërtesë të braktisur.

Kështu, në orët e mbrëmjes hynin në një ndërtesë të braktisur, bënin një vrimë në mur dhe më pas njëri nga grabitësit hynte në argjendari dhe zvarritej te vitrinat dhe merrte plaçkën.

Ata besohet se kanë marrë sende me vlerë të paktën 315,000 euro.

Serbët e dyshuar, siç thuhet, kanë përdorur dokumente të falsifikuara, kanë vozitur automjete me targa të huaja, për të parandaluar zbulimin e tyre.

Ata vinin te argjendaritë në këmbë ose me automjet, të cilin e parkonin në një distancë të caktuar, në mënyrë që policia të mos mund të lidhte makinën me ta.

Gjatë kontrollit në ambientet që kanë përdorur, policia ka gjetur ndër të tjera një mjet për thyerje, 190 euro, patentë shoferi false, tre celularë dhe sende të tjera me vlerë.

Gjatë hetimeve u sekuestruan edhe një makinë dhe një motoçikletë.

Policia ka deklaruar se më i moshuari ka bërë rezistencë ndaj arrestimit dhe se të dy të dyshuarit kanë precedentë të gjerë kriminal.

Të arrestuarit do t’i kalojnë prokurorisë kompetente për veprime të mëtejshme. /Telegrafi/