Publicisti serb: Beogradi duhet të përballet me realitetin për Kosovën, iluzion të pritet një ndryshim i politikës amerikane

Publicisti dhe gazetari Zlatoje Martinov deklaroi se dialogu mes Serbisë dhe Kosovës po stagnon, pasi autoriteteve në Beograd u përshtatet konflikti i ngrirë. Ai theksoi se përballja me realitetin për statusin e Kosovës është e domosdoshme dhe vlerësoi se është iluzore të pritet një ndryshim i politikës amerikane ndaj Ballkanit.

Martinov mendon se dialogu prej muajsh nuk po lëviz dhe se nuk do të ketë përparim, madje as me emërimin e një përfaqësuesi të ri të posaçëm të BE-së për dialogun. Sipas tij, problemi kryesor është mungesa e interesit në Serbi për të vazhduar bisedimet.

“Autoritetet aktuale nuk kanë interes për negociata. Konflikti i ngrirë u mundëson atyre të manipulojnë narrativat dhe të shmangin përballjen me realitetin”, tha Martinov për RTK-në.

Ai komentoi zgjedhjet e ardhshme në Kosovë, duke theksuar se pjesëmarrja më e madhe e serbëve në jetën politike mund të sjellë ndryshim, veçanërisht në veri.

Duke folur për kërkesën ndaj Serbisë që të zbatojë marrëveshjet tashmë të arritura, të cilat paraqesin një njohje de fakto të Kosovës, Martinov theksoi se pranimi i realitetit është thelbësor për vazhdimin e dialogut.

“Kosova është e pavarur prej kohësh, një fakt që është pranuar nga më shumë se njëqind shtete, përfshirë të gjitha fuqitë e mëdha, përveç Rusisë dhe Kinës. Nëse Beogradi vazhdon të këmbëngulë se Kosova është pjesë e Serbisë, bisedimet do të mbeten në ngërç. Dialogu duhet të fillojë nga faktet dhe jo nga ambiciet joreale”, theksoi ai.

Martinov vuri në dukje keqkuptimet për një ndryshim të mundshëm të politikës amerikane ndaj Kosovës me rikthimin e Donald Trumpit në krye të SHBA-së.

“Lidhjet mes Kosovës dhe SHBA-së janë të forta dhe të qëndrueshme. Trump nuk do ta ndryshojë këtë politikë. Administrata e tij po merret me sfida globale, si Kina, Tajvani, Lindja e Mesme dhe lufta në Ukrainë. Çështja e Kosovës nuk është prioritet”, tha Martinov.

Duke iu referuar protestave antiqeveritare në Serbi, Martinov theksoi rëndësinë e tyre dhe ndikimin në destabilizimin e autoriteteve.

“Këto protesta, veçanërisht bllokadat e organizuara nga studentët, përfaqësojnë një prerje të thellë në trungun e regjimit. Autoritetet kanë humbur orientimin, ndërsa dhuna dhe kompromiset nuk po japin rezultat. Energjia dhe këmbëngulja e studentëve janë kyçe”, vlerësoi ai.

Megjithatë, Martinov mendon se është e nevojshme artikulimi politik i qëllimeve të protestave për të përcaktuar drejtimin e tyre.

“Protestat kanë hapur shpresën për ndryshim, por tani është thelbësore të përcaktohen qëllimet dhe drejtimi politik”, përfundoi Martinov.