Pse jeta e natës nuk po u pëlqen spanjollëve

Dita spanjolle është jashtëzakonisht e gjatë. Dreka nuk fillon deri në dy pasdite. Puna shpesh përfundon pas shtatëve të mbrëmjes dhe darka fillon në orën tetë e gjysmë. Për kënaqësinë e disa turistëve të etur për të përjetuar një mënyrë tjetër jetese, shumë restorante mbyllen shumë pas mesnate, duke dërguar stafin në shtëpi në orët e para të mëngjesit.

Kështu, kur Yolanda Diaz, ministre për Punën dhe Ekonominë Sociale, e quajti kulturën e jetës së natës në vend si “çmenduri”, ajo nxiti reagime, raporton cnn.

“Asnjë vend i arsyeshëm nuk i mban restorantet e hapura deri në 01:00 të mëngjesit”, tha ajo gjatë një takimi të grupit parlamentar këtë muaj. “Është çmenduri të vazhdosh të shtiresh dhe të zgjasësh orët derisa të mos e dimë më sa është ora”.

“Por ne jemi të ndryshëm”, shkroi kryebashkiakja e Madridit, Isabel Ayuso, në platformën e mediave sociale X, duke e tërhequr debatin përgjatë linjave të partive politike. “Ata duan që ne të gjithë të jemi puritanë, socialistë”, shkroi ajo, “Të mërzitur dhe në shtëpi”.

Pavarësisht ditës së gjatë, spanjollët punojnë vetëm pak më shumë se mesatarja evropiane, 37.8 orë në javë sipas Komisionit Evropian. Megjithatë, ata flenë më pak se shumica e homologëve të tyre të Evropës Veriore, 7.13 orë në natë sipas Hartave të Shëndetit Publik.

Spanjollët nuk rrinin gjithmonë kaq vonë, thotë Marta Junque nga Instituti i Përdorimit të Kohës me qendër në Barcelonë, i konsultuar së fundmi nga qeveria spanjolle për të rregulluar ligjet e saj për orarin e punës.

“Spanja tani është unike për sa i përket orëve të vona që ne largohemi nga puna”, thotë Junque dhe shtoi se “nuk ka qenë gjithmonë kështu. Gjyshërit e mi punonin njësoj si gjithë të tjerët. Ata zgjoheshin kur lindte dielli dhe pushonin së punuari kur dielli perëndonte. Tani, errësohet në gjashtë ose shtatë dhe ne jemi ende duke punuar. Ajo që ne po mbrojmë është e drejta e kohës”, shton ajo.

Në gjuhën spanjolle, Siesta do të thotë “gjumë pasdreke”. Sot, megjithatë, më pak se 18 për qind e spanjollëve flenë rregullisht gjatë asaj kohe, sipas një sondazhi të vitit 2016. Më shumë se 50 për qind e të anketuarve thanë se nuk bëjnë kurrë një sy gjumë.

Megjithatë, Siesta, së bashku me ndryshimin e zonës kohore të Frankos, ka vendosur orën qarkore të ekonomisë së Spanjës gjatë natës.

Shumë dyqane në Spanjë mbyllen për dy ose tre orë pushim pasdite, duke zgjatur ditën për punonjësit dhe duke krijuar atë që Junque e përshkruan si “varfëri në kohë”. /Telegrafi/