PS sfidon Gjykatën Kushtetuese për mandatin e Xhaçkës. Çuçi: Nuk na detyron si të votojmë, shkojmë në Venecia

Socialistët vijojnë të injorojnë vendimin e Gjykatës Kushtetuese për mandatin e deputetes Olta Xhaçka, ndonëse trupa është shprehur dy herë tashmë, duke kërkuar që t’i çohet çështja për gjykim. 

Por sipas mazhorancës, askush nuk mund të detyrojë një deputet si të votojë në Parlament.

Kreu i grupit socialist Bledi Çuçi në konferencë me gazetarët e bëri të qartë se as sqarimet publike të kryetares së Gjykatës Kushtetuese, Holta Zaçaj, nuk mjaftojnë për të bindur shumicën. Për të mbrojtur kolegen e tyre, socialistët kanë zgjedhur të përfshijnë në këtë debat institucional Gjykatë-Parlament, një mekanizëm ndërkombëtar, siç është Komisioni i Venecias.

Mazhoranca e mohon që argumenti kundërshtues lidhet me frikën se ekziston mundësia që Xhaçkës mund t’i hiqet mandate për shkak se në momentin që ajo ishte në qeveri, bashkëshorti mori statusin e investitorit strategjik.

Përpos këtij shqetësimi, socialistët kanë në fokus edhe kongresin e PS të së dielës, në ankth për vendimet e Edi Ramës, që ka një historik vendimesh surprizë në forume të tilla. Pikëpyetjet më të mëdha janë mbi të ardhmen politike të Erion Veliajt, për të cilin kreu i grupit socialist dha mbështetjen e pakushtëzuar, duke e cilësuar si kryebashkiakun më të mirë nga PS.

Çuçi e bëri të qartë se PS është e fokusuar tek mandate i 4qeverisës, duke refuzuar kërkesën e opozitës për një qeveri teknike, që do të çonte vendin në zgjedhjet parlamentare të vitit 2025. /Telegrafi/