Protesta në Athinë – për mbrojtje të emrit ‘Maqedonia’ ose kundër Qeverisë?

Nën masa të forta të sigurisë, me rrugë dhe stacione të mbyllura në sheshin Sintagma para Parlamentit grek do të mbahet protesta e paralajmëruar, me qëllim të, siç thonë organizuesit “mbrojtjes së emrit Maqedoni”.

“Selaniku e tha, tani është rradha e Athinës të thotë: Maqedonia është një dhe greke, porositën organizuesit e protestës në një video inçizim duke bërë thirrje për pjesëmarrje sa më masive.

Sipas deklratave të organizuesve për mediat greke, parashikimet janë se në protestë do të ketë së paku 1 milion qytetarë.

Kush janë organizuesit e protestës?

Sipas lejes së dhënë nga komuna e Athinës, organizues zyrtar i protestës është “Komiteti koordinues i protestës mbarëkombëtare të lidhjeve maqedonase të botës”.

Pasi që Kisha ortodokse greke deklaroi se e përkrah protestën dhe disa herë doli me deklarata nacionaliste, patriku dhe kryepeshkopi i Konstantinopojës, Bartolomeu I publikoi deklaratë speciale në lidhje me negociatat mes Shkupit dhe Athinës për çështjen e emrit.

Ai ftoi për gjakftohtësi dhe mendje të shëndoshë në lidhje me këtë çështje shumë të ndjeshme dhe kritike për popullin grek, që të mund të zgjidhet në mënyrë të qetë.

Kundërprotesta

Në mënyrë paralele me protestën në sheshin Sintagma, në largësi prej 800 metrash, anarkistët përgatisin kundërprotestë, gjegjësisht tubim antifashisht. Fillimi zyrtar është në ora 12, dy orë më herët nga ai për “Maqedoninë”.

Dy protestat, sipas mediave greke, kanë kyçur alarmin në policinë greke. Ekziston frikë, brengosje, por edhe lëvzije e shtuar e policisë për shmangien e incidenteve të mundshme.

Mijëra protestues dje marshuan në Selanik, si paralajmërim për këtë të sotmin në Athinë. Protestuesit i bllokuan rrugët e qytetit për dy orë dhe kërkuan që në propozimin për zgjidhjen e kontestit të emrit të mos qëndrojë termi ‘Maqedonia’./Telegrafi/