Procesi i votimit, Krasniqi: Ngjyra shënjuese në gisht po fshihet lehtësisht, rrezik për votim të dyfishtë

Në Kosovë është duke u votuar për zgjedhjet parlamentare 2025. Procesi i votimit ka nisur në ora 07:00, ndërsa qendrat e votimit do të jenë të hapura deri në ora 19:00.

Albert Krasniqi nga Demokraci Plus (D+), në një reagim në Facebook, ka shkruar se ka bërë disa vëzhgime nga procesi i votimit, transmeton Telegrafi.

“1. Shënjimi i gishtërinjve me ngjyrë dalluese po fshihet lehtësisht, duke rritur rrezikun e votimit të dyfishtë. Kjo përbën një hap prapa krahasuar me praktikën e mëparshme të përdorimit të ngjyrës së padukshme, pasi qytetarët mund të bien pre e presioneve për të votuar ose për të mos votuar”, thotë ai.

Krasniqi shton tutje se edhe kabina e votimit është më e ulët dhe votuesit ulen në bankë, gjë që rrit rrezikun e cenimit të fshehtësisë së votës, veçanërisht kur një votues tjetër qëndron në këmbë.

Po ashtu, ai ka folur edhe për një problem tjetër.

“3.Mundësia për të votuar deri në dhjetë kandidatë në listë është e panevojshme, pasi sondazhet tregojnë se shumica e qytetarëve mezi arrijnë të zgjedhin katër preferenca. Ky proces jo vetëm që e ngadalëson votimin dhe numërimin e votave, por gjithashtu forcon kontrollin e liderëve partiakë mbi deputetët. Kandidatët lokalë do ta kenë shumë më të vështirë të zgjidhen, ndërsa do të favorizohen të preferuarit e liderit, të cilët përfitojnë më shumë hapësirë mediatike”, shtoi tutje ai.

Ndryshe, edhe në redaksinë e Telegrafit një lexuese ka dërguar fotografi, ku shihet se ngjyra dalluese është fshirë pothuajse plotësisht.

/Telegrafi/