Prishtina Trails, më shumë se një garë

Gërmia do të jetë parku që do mbushet me vrapues këtë fundjavë, me datën 22 e 23 qershor, më shumë se çdo periudhë tjetër gjatë vitit.

Kjo për arsye se Prishtina Trails organizon edicionin e gjashtë të vrapimit në shtigje malore ku pritet të garojnë rreth 300 pjesëmarrës vendor, nga Shqipëria e më gjerë.

Ata do të sfidojnë veten të dielën në tri disiplina: 10 kilometra, 23 kilometra, dhe distanca ultra 47 kilometra të shtrira nëpër kodrat më të bukura të peizazhit të mbrojtur të Gërmisë. 

Organizatorët kanë shtyrë mundësinë për regjistrim deri të mërkurën, 19 qershor, si përgjigje ndaj kërkesave për pjesëmarrje.

Detajet mund ti gjeni në kalanet zyrtare të Prishtina Trails në rrjete sociale. 

Fëmijët do të vrapojnë ditën e shtunë, me 22 qershor 2024, në një garë rekreative e cila do të përfundojë me një festë speciale për moshat e reja.

Për regjistrim, plotësoni formularin: https://tinyurl.com/3w84x7rk, meqë numri është i kufizuar.

Natyra, vetëdija mjedisore dhe Prishtina Trails

Sllogani i edicionit të gjashtë të “Prishtina Trails“ është: “Gërmia àsht e jotja mbroje”.

Ky park, një vend i shenjtë i natyrës në mes të urbanizmit të Prishtinës që e rrethon, po përballet me kërcënime nga ndotja, shpyllëzimi dhe zhvillimi. Prandaj “Prishtina Trails“ është më shumë se thjesht një garë – është një thirrje për veprim për të mbrojtur oazën tonë të çmuar të gjelbër pranë qytetit.

Krahas thirrjes për aktivitet fizik në natyrë, një element unik i këtij organizimi është partneriteti me kompani vendore për të reduktuar gjurmët mjedisore të shoqërisë sonë. 

“Prishtina Trails“ do të vazhdojë për të pestin vit të prodhojë medaljet për të gjithë vrapuesit me material të plastikës së mbicikluar – nga kapakët e shisheve plastike.

Sivjet rreth 16,000 kapakë do ti japin formë medaljeve të qindra garuesve dhe vrapuesve të vegjël. Për të siguruar këtë numër, tashmë janë angazhuar për mbledhjen e tyre me partnerët, kopshtet, shkollat dhe qendra komunitare.

Në këtë mënyrë rritet më tej vetëdija e fëmijëve, prindërve dhe komunitetit për qasjen tonë për veprime të qëndrueshme.