Politico shkruan për përplasjen mes kancelarit gjerman dhe presidentit serb rreth njohjes së Kosovës dhe sanksioneve ndaj Rusisë

Tensionet u rritën mes kancelarit gjerman Olaf Scholz dhe presidentit serb Aleksandar Vuçiq në një konferencë për shtyp të premten në mbrëmje, ku të dy liderët nuk ranë dakord jo vetëm rreth çështjes së sanksioneve kundër Rusisë, por edhe për njohjen e Kosovës si shtet i pavarur.

Kështu shkruan Politico, sipas të cilit medium, Scholz, i cili kishte shkuar në kryeqytetin e Serbisë, Beograd, gjatë një turneu dyditor në Ballkanin Perëndimor, Greqi dhe Bullgari, i tha audiencës se Serbia, si një kandidate për anëtarësim në BE, duhet të zbatojë sanksionet që blloku ka vendosur kundër Rusisë për luftën e saj në Ukrainë — diçka që vendi ballkanik deri më tani ka refuzuar ta bëjë, përcjell Telegrafi.

“Është pritshmëria jonë… që këto sanksione do të mbështeten gjithashtu nga të gjithë ata që e shohin veten si kandidatë për pranim në BE”, citon mediumi në fjalë Scholz të ketë thënë para gazetarëve.

Më vonë në konferencën për shtyp, ai shtoi se Serbia duhet të marrë një vendim sanksionesh sa më shpejt që të jetë e mundur, duke argumentuar se “kjo është diçka që bëhet më së miri jo kur [lufta] të ketë mbaruar, por kur ende ka rëndësi”.

Vuçiq, megjithatë, tentoi të “mbrohej” duke bërë një krahasim midis pushtimit rus të Ukrainës dhe misionit ushtarak të NATO-s kundër Serbisë në vitin 1999.

“Çfarë ndryshimi ka nëse dikush sulmon Serbinë pa një vendim të Këshillit të Sigurimit të Kombeve të Bashkuara, apo nëse dikush ndërmerr një sulm kundër Ukrainës pa një vendim të Këshillit të Sigurimit të Kombeve të Bashkuara? Ju lutem më shpjegoni ndryshimin”, thuhet të ketë shtruar pyetjen presidenti serb.

Kjo, vlerëson Politico, ishte një deklaratë e jashtëzakonshme e liderit serb.

“Edhe pse NATO sulmoi Serbinë në vitin 1999 pa një rezolutë të Këshillit të Sigurimit të OKB-së – Rusia dhe Kina kishin vendosur veton e tyre – ajo e bëri këtë për të mbrojtur shqiptarët në Kosovë mes frikës për një gjenocid të mundshëm, i cili është shumë i ndryshëm nga lufta pushtuese e Rusisë kundër Ukrainës”, shkruan më tej Politico.

Vuçiq gjithashtu u përpoq të justifikonte hezitimin e vendit të tij për të sanksionuar Rusinë duke iu referuar besnikërisë së Moskës ndaj Serbisë në Këshillin e Sigurimit dhe lidhjeve të ngushta shekullore midis dy vendeve, si dhe varësisë së Beogradit në importet ruse të energjisë.

“Pozicioni i Serbisë është shumë i ndërlikuar”, ka thënë Vuçiq.

Megjithatë, ndërsa dallimet midis Scholz dhe Vuçiq për çështjen e sanksioneve ndaj Rusisë kishin qenë disi të parashikueshme, një çështje tjetër pa një shkëmbim edhe më të nxehtë midis dy politikanëve.

Më herët të premten, Scholz kishte thënë gjatë një vizite në kryeqytetin e Kosovës në Prishtinë se Kosova dhe Serbia mund të bëhen anëtarë të BE-së vetëm nëse e njohin njëri-tjetrin si shtete të pavarura – një kërkesë e diskutueshme për Serbinë, e cila pretendon sovranitetin mbi Kosovën.

Dhe i pyetur në lidhje me komentet e Scholz-it, Vuçiq, siç shkruan Politico, tha: “… Ajo që u tha në lidhje me njohjen reciproke është gjithashtu një surprizë për ne”, shtoi ai. “Deri më tani nuk e kemi dëgjuar këtë nga askush në Evropë”.

Megjithatë Scholz u përgjigj se “pikëpamja jonë për çështjen e Kosovës nuk është e re” dhe argumentoi se ishte “e qartë” që vendet që duan të anëtarësohen në BE duhet të njohin njëri-tjetrin.

Politico vlerëson se shkëmbimi i nxehtë mes të dy liderëve ishte i jashtëzakonshëm duke pasur parasysh se Scholz konsiderohet një aleat i vendeve të Ballkanit Perëndimor në përpjekjet e tyre për t’u bërë anëtarë të BE-së.

Sipas këtij mediumi, vendet e tjera të BE-së si Franca kanë qenë më ngurruese për t’i dhënë Ballkanit Perëndimor një perspektivë anëtarësimi.

Dhe për fund, vë në pah Politico, me sa duket, duke e kuptuar këtë, Vuçiq u përpoq të shtonte disa fjalë më miqësore.

“Ne kemi besim të plotë në fjalët e kancelarit Scholz kur bëhet fjalë për faktin se ai vërtet i jep një prioritet të lartë pranimit të shteteve të Ballkanit Perëndimor”, tha ai.

“E di që kancelari Scholz është shumë serioz për këtë. Në fakt mund të mësojmë diçka dhe atmosfera mund të përmirësohet”, ka shtuar Vuçiq. /Telegrafi/