Policia në Serbi bastis organizatat e shoqërisë civile të financuara nga USAID

Policia serbe realizoi një bastisje të martën në zyrat e katër organizatave të shoqërisë civile si pjesë e një hetimi për keqpërdorim të fondeve të Agjencisë Amerikane për Zhvillimin Ndërkombëtar (USAID) në Serbi.

Ky aksion erdhi pas një vendimi të administratës së presidentit amerikan, Donald Trump në muajin janar për të ngrirë fondet e USAID-it për 90 ditë, si dhe për të ndërmarrë hapa për shpërbërjen e agjencisë, duke shkarkuar mbi një mijë punonjës.

Prokurori i Shtetit, Nenad Stefanoviq, theksoi se Serbia ka kërkuar informacione nga Departamenti amerikan i Drejtësisë për dyshimet mbi keqpërdorimin e fondeve të USAID-it dhe pastrimin e parave. Kjo kërkesë lidhet me deklarata të zyrtarëve amerikanë, përfshirë presidentin amerikan dhe Sekretarin e Shtetit, Marco Rubio, pas vendimit për ngrirjen e fondeve, shkruan danas.rs.

Lexo po ashtu Trump kritikon ndarjen e fondeve të USAID-it, përmend Kosovën dhe Serbinë

Departamenti kundër korrupsionit kërkoi nga policia që të mbledhë të dhëna dhe prova për shpenzimet e dyshimta të fondeve të USAID-it, si dhe për dyshimet për pastrim parash. Policia u udhëzua gjithashtu të grumbullojë dokumentacionin rreth donacioneve të USAID-it për katër organizata joqeveritare, transmeton Telegrafi.

Dy nga këto organizata, CRTA dhe Nisma Qytetare, konfirmuan se forcat policore bastisën zyrat e tyre. CRTA, e cila vëzhgon zgjedhjet në Serbi, theksoi se ishte duke bashkëpunuar me autoritetet, ndërsa Nisma Qytetare e cilësoi bastisjen si një sulm të rëndë ndaj të drejtave civile dhe një vazhdimësi të trysnisë ndaj shoqërisë civile.

Bastisjet ndodhin në një kohë kur qeveria e presidentit, Aleksandar Vuçiq po përballet me protesta të rritura kundër korrupsionit, që janë shndërruar në një lëvizje të madhe kundër korrupsionit. Këto protesta janë udhëhequr nga studentë dhe po krijojnë tensione për presidentin serb, që është një mbështetës i fortë i Trumpit dhe presidentit rus, Vladimir Putin.

USAID ka investuar miliarda dollarë në vendet e Ballkanit, përfshirë Serbinë, duke mbështetur demokracinë, infrastrukturën dhe organizatat joqeveritare, si dhe duke promovuar reformat dhe zhvillimin ekonomik. Sipas opozitës dhe mediave të pavarura, shumica e fondeve të USAID-it në Serbi janë dhënë institucioneve shtetërore. /Telegrafi/