Policia izraelite të mërkurën mbylli autostradën kryesore Jerusalem-Tel Aviv dhe evakuoi banorët përgjatë rrugës ndërsa zjarret në shkurre shpërthyen përsëri në një zonë të shkatërruar nga flakët një javë më parë.
Komunitetet e vendosura rreth 30 kilometra (19 milje) në perëndim të Jerusalemit u evakuuan, raportuan mediat izraelite, duke transmetuar imazhe të ekipeve të zjarrfikësve që luftonin me flakët e ashpra, shkruajnë mediat e huaja, përcjell Telegrafi.
Temperaturat e larta dhe erërat e forta kanë lejuar që zjarret në zonat e pyllëzuara të përhapen shpejt, duke nxitur evakuime nga të paktën pesë komunitete, tha policia në një deklaratë.
Ofruesi i shërbimeve të urgjencës Magen David Adom tha në një deklaratë se "në këtë fazë, nuk ka viktima të raportuara".
"Ekipet e ambulancës, njësitë e kujdesit intensiv dhe automjetet e reagimit të menjëhershëm po ofrojnë mbështetje mjekësore për operacionet e zjarrfikësve".
Ndërsa ministri i Sigurisë Kombëtare, Itamar Ben Gvir, i cili mbikëqyr departamentin e zjarrfikësve të Izraelit, tha në një deklaratë se po shkonte në zonën e prekur, e cila shpesh sheh zjarre në këtë kohë të vitit.
Kur shpërthyen zjarre në të njëjtën zonë javën e kaluar, kryeministri Benjamin Netanyahu kishte bërë thirrje për masa më të shtuara për të shuar flakët dhe tha se ato duhet të ndalen përpara se të arrijnë në Jerusalem, gjë që përfundimisht ndodhi. /Telegrafi/
