Policia e Kosovës sekuestron një armë në Prizren, në një aheng familjar

Policia e Kosovës ka arritur të sekuestrojë një armë të zjarrit e cila është përdorur nga një person, në Prizren.

Në një njoftim nga zyra e informimit të Policisë së Kosovës, personi e ka përdorur armën gjatë një ahengu familjar me 14 korrik 2019, duke kryer veprën penale ‘shkaktim i rrezikut të përgjithshëm’.

“Arma e sekuestruar nga policia është pistoletë Stoeger Cougar 8000F, një karikator dhe 42 fishekë të kalibër 9 mm’, ku i dyshuari ka poseduar lejen përkatëse për armë”, thuhet në njoftim.

Sipas njoftimit, në vendin e ngjarjes kanë dalë Njësia e Krim-teknikës, të cilët e kanë sekuestruar armën e dyshimtë.

“Në lidhje me këtë rast është informuar prokurori i Shtetit dhe rasti shkon në procedurë të rregullt hetimore. Përdorimi i armëve të zjarrit në ahengje familjare përveç shkaktimit të rrezikshëm përbën edhe vepër penale me pasoja, andaj kërkojmë që të ‘festohet me zemër e jo me armë’, me qëllim që gëzimi të mos shndërrohet në hidhërim”, thuhet ndër të tjera në njoftim. /Telegrafi/