Policia dhe AGK-ja zotohen për bashkëpunim të ndërsjellë

Drejtori i Përgjithshëm i Policisë së Kosovësë, Shpend Maxhuni ka pritur sot në takim kryesuesin e bordit të Asociacionit të Gazetarëve të Kosovës, Shkëlqim Hysenaj dhe Petrit Çollaku hulumtues në AGK.

“Maxhuni fillimisht falënderoi përfaqësuesit e AGK-së për vizitën e tyre dhe njëkohësisht gjatë takimit njoftoi të pranishmit mbi angazhimet, aktivitetet dhe objektivat e Policisë së Kosovës, karshi bashkëpunimit dhe transparencës me media.

Përveç tjerash në këtë takim të pranishmit u njoftuan se Policia e Kosovës është e gatshme që të bashkëpunojë ngushtë me AGK-në, në çfarëdo fushe e cila ka për qëllim ngritjen e mëtutjeshme të bashkëpunimit të ndërsjellë, bashkëpunim ky i cili në realitet po ndodh me të gjitha zyrat e informimit të PK-së dhe mediat në përgjithësi”, thuhet në njoftimin për media.

Drejtori i PK-së, Maxhuni njoftoi përfaqësuesit e AGK-së se Policia e Kosovës tashmë ka dëshmuar veten se është profesionale dhe e përgatitur që të ofrojë siguri për të gjithë qytetarët e vendit në përgjithësi, e për gazetarët në veçanti.

“Nga ana e tij Hysenaj falënderoi Policinë e Kosovës, në këtë rast drejtorin Maxhuni për pritjen e bërë si dhe njëkohësisht njoftoi të njëjtin për angazhimin e Asociacionit të Gazetarëve të Kosovës në një projekt regjional “Liria e Mediave dhe Siguria e Gazetarëve” që nga fillimi i vitit 2016, duke përfshirë të gjeturat dhe rekomandimet e dala nga ky raport.

Njëkohësisht përfaqësuesit e AGK-së, kërkuan që Policia e Kosovës t’i trajtojë me prioritet rastet e sulmeve apo kanosjeve ndaj gazetarëve dhe për të njëjtat të bashkëpunojë me organet e drejtësisë”, thuhet më tej në njoftim.

Gjatë takimit, i cili u realizua në ambientet e Drejtorisë së Përgjithshme të Policisë së Kosovës, Maxhuni dhe Hysenaj u zotuan për bashkëpunim të ndërsjellë edhe në të ardhmen, duke përfshirë edhe takime apo trajnime të përbashkëta të cilat do të ndikonin pozitivisht në të gjitha aspektet e bashkëpunimit polici-media./Telegrafi/