Po rriten me shpejtësi alternativat e platformës X – Bluesky dhe Threads

Platforma X dhe Threads vazhdojnë të kenë një numër shumë më të madh përdoruesish krahasuar me Bluesky. Zgjedhja e Donald Trump si president i ri i SHBA-ve dhe përfshirja e një moguli teknologjik (dhe pronarit të platformës X) në administratën e tij ka ndikuar edhe në tregun e rrjeteve sociale.

Që kur Elon Musk mori në dorë atë që dikur njihej si Twitter, shumë përdorues paralajmëruan largimin nga platforma – dhe një pjesë e tyre e realizuan këtë. Një valë e re e të ashtuquajturve “Twitter quitter-a” u shfaq pasi Musk shprehu mbështetjen për Trumpin. Sipas Forbes, në shtatorin e vitit të kaluar, platforma X kishte 588 milionë përdorues globalë, një rënie nga 611 milionë që kishte në prill të po atij viti, ndërsa ky trend i largimeve ka vazhduar.

Kjo situatë ka krijuar mundësi për rrjete të tjera sociale, dhe më i suksesshmi deri më tani është Threads, i lançuar nga Mark Zuckerberg, i cili ka arritur një numër të madh përdoruesish në kohë të shkurtër. Sipas të dhënave të fundit, Threads ka rreth 275 milionë përdorues aktivë në ditë.

Rritja e madhe pas zgjedhjeve
Një tjetër platformë që po fiton popullaritet me ritme të shpejta është Bluesky. Interesante është se kjo platformë fillimisht u krijua brenda Twitterit, kur CEO i tij ishte Jack Dorsey. Popullariteti i saj filloi të rritet pas blerjes së Twitterit nga Musk, por një rritje e ndjeshme e numrit të përdoruesve ndodhi pas zgjedhjeve në SHBA. Që atëherë, Bluesky ka fituar rreth 15 milionë përdorues të rinj dhe aktualisht numëron 32 milionë përdorues.

Ajo që bie në sy është fakti se shumë nga përdoruesit e rinj të Blueskyt kanë përmendur zgjedhjet amerikane në postimet e tyre të para, duke sugjeruar se vendimi për t’iu bashkuar platformës lidhet drejtpërdrejt me ndikimin e Trumpit dhe Musk.

Në shtator, Bluesky kishte vetëm 9 milionë përdorues, por kohët e fundit ka arritur edhe një moment historik: përdoruesja e parë me mbi një milion ndjekës është politikania amerikane Alexandria Ocasio-Cortez, e cila tashmë i afrohet dy milionë ndjekësve.

Megjithëse numri i përdoruesve të Blueskyt mbetet ende i vogël krahasuar me X dhe Threads, është e qartë se platforma po rritet. Megjithatë, mbetet për t’u parë se sa shpejt do të vazhdojë kjo rritje dhe nëse do të arrijë ndonjëherë të rivalizojë seriozisht rrjetet sociale me një bazë shumë më të madhe përdoruesish. /Telegrafi/