Vera është stina e lirisë, e lëvizjes dhe e teksturës natyrale të flokëve. Është koha të zgjidhni një prerje që ju lejon të shkëlqeni me vetëm pak përpjekje, qoftë në plazh, në një darkë buzë perëndimit të diellit apo në ndonjë festival veror
Temperaturat po ngjiten dhe vera është te dera dhe ju dëshironi të dukeni bukur pa kaluar shumë kohë para pasqyrës? Në këtë frymë, frizurat moderne vijnë si shpëtim, duke kombinuar thjeshtësinë me elegancën. Në fund të fundit, kur jeni në bregdet, dëshironi që flokët të duken natyrshëm dhe njëkohësisht tërheqës.
Pavarësisht nëse preferoni flokët e shkurtër, ato shumë të gjatë apo jeni adhuruese e stilit “wet look”, këto janë pesë frizurat që do të dominojnë këtë verë, si në plazh, ashtu edhe në netët nën yje dhe aventurat verore, transmeton Telegrafi.
1. Kaçurrela natyrale, sa më të egra, aq më mirë
Diell + det = flokë valëzuese perfekte! Këtë verë harroni drejtimin dhe stilimin me nxehtësi. Lërini kaçurrelat të tregojnë historinë tuaj në mënyrën më të natyrshme. Përdorni sprej për teksturë ose produkte të lehta për volum. Dhe për një dozë shtesë stili , shtoni balluke! I japin pamjes një prekje “retro”, një ndjesi të viteve ‘60 dhe një hijeshi të papërmbajtshme.
2. Flokë shumë të gjatë për mbretëreshat boho të plazhit
Edhe pse zakonisht flokët shkurtohen gjatë verës, modeli me flokë shumë të gjatë po mbretëron sërish. Sidomos me valëzime “surfer style” ose stilin ultra të drejtë “glass hair”. Balluket që fshihen lehtas mbi sy i japin pamjes një ndjesi misterioze. Dhe për ato që duan më shumë dramë, gërshetat janë hapi i radhës. Nuk janë për të gjitha, por nëse e dashuroni stilin që bie në sy, ky është momenti!
3. “Curve cut” apo flokë me 100 shtresa
Frymëzuar nga frizura ikonike e Jennifer Aniston në serialin "Friends", kjo prerje është një ndër më të preferuarat e verës. E përkryer për të theksuar tiparet e fytyrës, sidomos mollëzat dhe nofullën. Prerja bëhet me kujdes, shtresë pas shtrese, me majat e flokëve të kthyera butë drejt brendësisë. Rezultati? Flokë që përqafojnë fytyrën në mënyrën më femërore dhe lëvizin me elegancë në çdo hap. Një zgjidhje ideale për ato që duan stil pa shumë përpjekje.
4. Bob i valëzuar
Bob-i është klasik i përjetshëm, por këtë verë vjen me një frymë të re. Harrojeni pamjen e drejtë dhe të përsosur. Zgjidhni valëzime të lehta, pak asimetri dhe gjatësi që ndalet pak poshtë veshit. E veçanta? Ky model nuk kërkon aspak stilim të përditshëm! Mjafton një spërkatje me sprej me kripë deti dhe jeni gati për aventurën. Bob-i më i mirë i verës është ai që luan me gjatësi, teksturë dhe karakter.
5. Efekti “sapo dola nga uji”
Po përgatiteni për një dalje në mbrëmje pranë detit? Nuk ka nevojë të thani flokët! Këtë verë, “wet look” kapërcen çdo kufi dhe shndërrohet në një prej trendeve më të nxehta. Stili i flokëve të lagur dominon edhe në pasarelat e modës. Është një pamje seksi, moderne dhe praktike, perfekte për të ndriçuar netët verore. /Telegrafi/
