Përfshirja e grave në listat zgjedhore, D4D: LVV dhe AAK shënojnë rënie

Partitë politike tashmë kanë zyrtarizuar listat zgjedhore me kandidatët për deputetë.

Edhe këtë vit, subjektet politike janë kujdesur që të respektojnë vetëm kriterin minimal të plotësimit të kuotës gjinore për 30%.

Instituti Demokracia për Zhvillim (D4D) në një njoftim ka bërë të ditur se për vite me radhë ka inkurajuar partitë politike që përpilimi i listave zgjedhore të bëhet në përputhje me Ligjin për Barazi Gjinore.

Sipas D4D, disa nga partitë politike kanë shënuar rënie e disa ngritje, kurse të tjerat kanë mbetur në përqindje të njëjtë, sa i përket përfshirjes së grave në listat zgjedhore.

“Lëvizja Vetëvendosje në krahasim me vitin 2021, ka rënie me 7%; Partia Demokratike e Kosovës në krahasim me vitin 2021, shënon rritje për 1%; Lidhja Demokratike e Kosovës përfaqësohet njësoj me 33%; Aleanca për Ardhmërinë e Kosovës shënon rënie për 2%”, thuhet në njoftim.

Instituti D4D ka ftuar të gjitha subjektet politike që në vazhdimësi të ciklit të procesit zgjedhor të ofrojnë hapësirë të barabartë për burrat dhe gratë, përfshirje në fushatën zgjedhore dhe pjesëmarrje në debate televizive. /Telegrafi/