Pasagjerja nuk e dinte se ishte shtatzënë, lind në aeroplan derisa po udhëtonte nga Ekuadori për në Spanjë

Lindja e një fëmije gjatë një fluturimi nga Guyaquil, Ekuador në Amsterdam i befasoi të gjithë në aeroplan në fillim të kësaj jave.

Një zëdhënës i linjës ajrore KLM ka thënë të shtunën mbrëma se profesionistët mjekësorë ndihmuan në lindje, “për të cilën ne u jemi shumë mirënjohës atyre”.

Dhe sipas tij, “nëna dhe fëmija po shkojnë mirë”, shkruajnë mediat e huaja, përcjell Telegrafi.

Nëna e re, Tamara, dhe fëmija i saj u shtruan në spitalin Spaarne Gasthuis Haarlem Zuid pasi zbritën në aeroportin Schiphol.

Tamara po udhëtonte nga Ekuadori për në destinacionin e saj në Spanjë, me një ndalesë në aeroportin Schiphol jashtë Amsterdamit.

“Disa orë para uljes në Holandë, i dhimbte stomaku dhe vendosi të shkonte në tualet. Për habinë e saj të madhe, pas dy kontraktimeve, ajo papritmas pati një fëmijë në duart e saj”, citohet të ketë thënë spitali.

Ajo e quajti djalin Maximiliano.

Madje, siç pretendohet më tej, “Tamara nuk e kishte idenë se ishte shtatzënë dhe ishte mjaft e befasuar nga ngjarja”.

Në aeroplan ishin dy mjekë dhe një infermiere nga Austria, të cilët ishin në gjendje të ndihmonin nënën pas kësaj lindjeje befasuese. /Telegrafi/