Pas reagimeve të fundit, Haxholli thotë se ka marr vërejtje nga MPJD

Sekretari i Zyrës Ndërlidhëse të Kosovës në Serbi, Fatmir Haxholli, thotë se ka marrë vërejtje me shkrim nga Ministria e Punëve të Jashtme dhe Diasporës, pas reagimeve të tij të fundit lidhur me arrestimin e një qytetari të Kosovës nga autoritetet e Serbisë.

Haxholli, përmes një postimi në Facebook, ka kërkuar të dijë se ku, kur dhe në cilin aspekt, deklarimet e tij kanë rënë ndesh me mandatin e Zyrës Ndërlidhëse të Kosovës në Serbi dhe me prioritetet e MPJD-së.

“Për reagimet dhe deklarimet e mia të vazhdueshme në mbrojtje të interesit publik, qytetarë dhe para së gjithash në mbrojtje të interesit shtetëror, unë sapo mora një Vërejtje me shkrim nga MPJD. Njëherësh për dallim prej pafund rekomadimeve, referencave, e vlerësimeve, në MPJD dhe jashtë saj, kjo është vërejtja e parë në përvojën time profesionale, institucionale. Uroj që kjo të jetë edhe e fundit”, ka shkruar Haxholli, transmeton Telegrafi.

Lexo po ashtu Pas arrestimit të një qytetari në Serbi, Haxholli: Të vetmit që kanë bërë krime në Koshare janë forcat serbe

“Më duhet ta them që nuk kam pritur që duke qenë i zëshëm kundër veprimeve të Serbisë, do të vlerësohem apo avancohem në ndonjë mënyrë, dhe as që ka qenë qëllim i imi diçka e tillë, por më duhet ta them dhe ri-përsëris, që edhe sikur masa korrigjuese ndaj meje të ishte vet suspendimi dhe largimi nga MPJD, në asnjë rast, nuk ushqej asnjë dilemë, që në të gjitha komunikimet e mia pararake, unë të veproja njësoj, përsëri”.

Haxholli ka thënë se “përderisa në Serbi bëhet garë se kush pronocohet më shumë dhe më ashpër kundër Republikës së Kosovës, pa asnjë argument dhe pa asnjë të drejtë, me mirëkuptim do t’i kërkoja hirearkisë së MPJD-së, porositësit dhe shqiptuesit, se ku, kur dhe në cilin aspekt, deklarimet e mia kanë shkuar ndesh me mandatin e Zyrës dhe me prioritetet e MPJD-së”.

“Në mungesë të një arsyetimi eventual përmbajtësor, unë Vërejtjen ndaj meje me dokumente/dëshmi shoqëruese sikurse janë postimet e mia bashklidhur asaj, do t’i mbaj si si Referencë dhe Rekomandim, e kësisoj nuk do t’i ankimoj juridikisht. Ju falënderoj që së paku përmes Vërejtjes njohët punën time, sepse në një kulturë ndëshkuese dhe përjashtuese, do të befasohesha vetëm nga një mirënjohje a vlerësim!” , ka shkruar Haxholli, duke sqaruar se “Për vërejtjen si informatë zyrtare që nuk prek dimensionin e politikës së jashtme, por vetëm personin tim, besoj që ja vlen që dikush t’i gëzohet idesë, që heshtja në diplomaci ka ndonjë vlerë!”. /Telegrafi/