Pas nëntë muajsh të bllokuar në hapësirë, astronautët kthehen në Tokë – NASA zbulon se çfarë do të ndodhë tani me ta

Dy astronautë të NASA-s janë kthyer në Tokë pasi kaluan më shumë se nëntë muaj të ngecur në hapësirë.

Bëhet e ditur se udhëtimi i Butch Wilmore dhe Suni Williams për t’u kthyer nga Stacioni Ndërkombëtar i Hapësirës zgjati 17 orë.

Administratori i lartë i NASA-s Joel Montalbano e përshkroi uljen në Florida si “të bukur” – dhe tha se 150 eksperimentet e tyre dhe 900 orë kërkime do të informojnë për misionet e ardhshme në Hënë.

“Ekuipazhi po bën punë të shkëlqyer”, tha menaxheri i NASA-s, Steve Stich – duke shtuar se astronautët tani do të kenë një “pushim të merituar” me familjet e tyre.

Dyshja ishte menduar të qëndronte në ISS vetëm për tetë ditë kur u larguan nga Toka më 5 qershor të vitit të kaluar.

Ata po testonin Starliner e shumëpritur të Boeing – një anije e krijuar për të rivalizuar Crew Dragon të SpaceX, e cila aktualisht përdoret për të transportuar astronautët në hapësirë.

Por në kohën kur ata u ankoruan në ISS, Starliner kishte pësuar probleme të mëdha.

Anija u kthye në Tokë pa astronautët, pasi u vendos që Wilmore 62-vjeç dhe Williams 59-vjeç, do të ishin më të sigurt duke pritur në orbitë.

Lexo po ashtu Dy astronautët e bllokuar në hapësirë ​​për më shumë se nëntë muaj kthehen në Tokë

Gjatë pritjes së tyre të gjatë në hapësirë, dy veteranët e marinës amerikane përfunduan shëtitjet në hapësirë, eksperimentet dhe madje ndihmuan në rregullimin e hidraulikës në bordin e ISS.

Astronautët thanë në mënyrë të përsëritur se u pëlqente misioni, me Williams që e përshkroi stacionin hapësinor si “vendin e saj të lumtur”.

Ndryshe, të jetosh në hapësirë ​​për muaj të tërë mund të ndikojë në trupin e njeriut në mënyra të shumta, nga atrofia e muskujve deri te dëmtimi i mundshëm i shikimit.

Wilmore dhe Williams kanë regjistruar 286 ditë në hapësirë ​​në mision – më shumë se gjatësia mesatare gjashtëmujore e misionit ISS, por shumë më pak se mbajtësi i rekordit amerikan Frank Rubio.

Në përgjithësi, ata tani do të kalojnë një periudhë të gjatë rikuperimi, që mund të përfshijë terapi fizike, monitorim mjekësor dhe mbështetje psikologjike, për t’u siguruar që ata janë të gatshëm për të rifilluar jetën normale pas një periudhe të gjatë në hapësirë.

Kjo pasi ata do të përballen me sfida të mëdha, për faktin se graviteti i Tokës është shumë më i madh se ai i hapësirës, dhe kjo mund të shkaktojë disa efekte të padëshiruara në trupat e astronautëve.

Misioni ka tërhequr vëmendjen edhe të presidentit të SHBA-së, Donald Trump, i cili me marrjen e detyrës në janar bëri thirrje për një kthim më të shpejtë të astronautëve – dhe pretendoi pa prova se ish-presidenti Joe Biden i kishte “braktisur” ata për arsye politike.

CEO i SpaceX, Elon Musk, i bëri jehonë thirrjes së tij për një kthim të menjëhershëm. /Telegrafi/