Pas kërkesës për arrestimin e Ahmetajt, mblidhet nesër Këshilli për Mandatet në Kuvendin e Shqipërisë

Pas kërkesës së Prokurorisë së Posaçme SPAK, e cili kërkoi arrestimin e ish-zëvendëskryeministrit Arben Ahmetaj, bëhet me dije se, nesër në orën 16:00 do të mblidhet Këshilli për Rregulloren, Mandatet dhe Imunitetin në Kuvendin e Shqipërisë për të shqyrtuar këtë kërkesë.

Prokuroria e Posaçme Kundër Korrupsionit i ka kërkuar autorizim Kuvendit për arrestimin dhe kontrollin e banesës së Ahmetajt.

Ish-ministri në disa dikastere po hetohet për “shpërdorim të detyrës”, “fshehje të të ardhurave”, “korrupsion” dhe “pastrim të parave”. SPAK, bashkangjitur kërkesës për arrestimin e Ahmetaj ka dërguar në Kuvend edhe një dosje voluminoze.

Lexo po ashtu Mbërrin kërkesa për autorizim në Kuvend, Prokuroria e Posaçme kërkon arrestimin e Arben Ahmetajt

Në fillim të muajit mars, agjentët e Byrosë Kombëtare të Hetimit (BKH) kryen kontrolle në banesën e partneres së ish-ministrit Arben Ahmetaj në Hamallaj dhe në banesën e ish-bashkëshortes së tij në Tiranë. Shtëpia në Hamallaj dhe një vilë në Palasë, që dyshohet se i përket ish-bashkëshortes së Ahmetajt, u vendosën nën sekuestro preventive nga Gjykata e Posaçme.

Ahmetaj është një nga personat më të akuzuar nga ana e opozitës, si i përfshirë në çështjen e inceneratorëve, për të cilën SPAK ka marrë disa të pandehur, mes tyre edhe ish-ministrin e Mjedisit, Lefter Koka dhe ish-deputetin e PS, Alqi Bllako.

Në korrik të vitit të kaluar, Ahmetaj u shkarkua nga posti i zv.kryeministrit dhe i ministrit për Rindërtimin, por nuk u emërua në asnjë pozicion tjetër brenda kabinetit Rama. Gjithashtu, ai nuk u konfirmua si drejtues politik i PS-së në Vlorë, pozicion që iu besua Blendi Klosit. /Telegrafi/