Pas gjetjes së trupit të Alexei Navalny, flet zëdhënësja e tij

Trupi i Alexei Navalny, të cilin familja dhe aleatët e tij po përpiqeshin ta gjenin që nga e premtja, është gjetur, sipas raportimeve.

Novaya Gazeta Europe ka raportuar se trupi i tij është në morgun e Spitalit Klinik të Qarkut Salekhard, shkruan Sky News, përcjell Telegrafi.

Mediumi në fjalë gjithashtu raportoi se burimet e tij thanë se asnjë autopsi nuk ishte kryer ende që nga e shtuna.

Novaya raportoi se trupi i tij fillimisht u dërgua në qytetin e Labytnangi, rreth 20 milje larg nga burgu ku ai vdiq, përpara se të transferohej në spital në kryeqytetin rajonal të Salekhard më vonë të premten.

Lexo po ashtu Çfarë dihet deri më tani për vdekjen e Alexei Navalnyt – kritiku i Putinit që po mbahej në njërin prej burgjeve më të këqija të Rusisë

Novaya Gazeta Europe është një projekt i nisur nga stafi i gazetës pasi Novaya Gazeta, gazeta kryesore e pavarur ruse, pezulloi punën e saj në vitin 2022 nën presionin e qeverisë.

Familja dhe aleatët e Navalny-t thonë se ata janë “përcjellur në qarqe” nga autoritetet ruse ndërsa përpiqeshin të gjenin trupin e tij.

Kira Yarmysh, zëdhënësja e liderit të opozitës ruse, më parë tha se nënës së Navalny i ishte thënë nga një zyrtar burgu se trupi i djalit të saj ishte dërguar në qytetin e afërt të Salekhardit si pjesë e një hetimi për vdekjen e tij.

Por kur ajo dhe avokatët e Navalny mbërritën në morg, ai u mbyll dhe punëtorët thanë se trupi nuk ishte aty.

Pak orë më vonë, zonja Yarmysh tha se avokatëve të politikanit iu tha se trupi i Navalny nuk do t’u dorëzohej të afërmve të tij derisa të përfundonte një hetim për vdekjen e tij. /Telegrafi/