“U qëllova nga një plumb në veshin tim të djathtë”, Trump del me deklaratë pas atentatit

Ish-presidenti amerikan, Donald Trump, së fundmi i shpëtoi një atentati gjatë një tubimi elektoral në Pensilvani, SHBA.

Trump në rrjetin e tij social, Truth Social, ka falënderuar zyrtarët e zbatimit të ligjit për veprimet e tyre të shpejta pasi ai u qëllua me një plumb që shpoi pjesën e sipërme të veshit të tij të djathtë, përpara se Shërbimi Sekret të neutralizonte personin e armatosur.

Kandidati i supozuar republikan tha se dëgjoi “një tingull fërshëllimë, të shtëna dhe menjëherë ndjeu se plumbi po çante lëkurën e tij”, përcjell Telegrafi.

Nuk është ende e qartë nëse Trump është goditur nga një plumb apo copëza, por gjaku u duk se u shpërnda në veshin dhe fytyrën e tij ndërsa agjentët e Shërbimit Sekret e nxorrën jashtë skenës.

“Dua të falënderoj Shërbimin Sekret të Shteteve të Bashkuara dhe të gjithë Forcat e Zbatimit të Ligjit, për reagimin e tyre të shpejtë për të shtënat që sapo ndodhën në Butler, Pensilvani”, shkroi Trump në platformën e tij të mediave sociale, Truth Social.

“Më e rëndësishmja, dua t’i shpreh ngushëllimet e mia familjes së personit të vrarë, si dhe familjes së një personi tjetër që mbeti i plagosur rëndë. Është e pabesueshme që një akt i tillë mund të ndodhë në vendin tonë. Për momentin nuk dihet asgjë për gjuajtësin, i cili tani është i vdekur”, shtoi Trump.

Unë u qëllova me një plumb që shpoi pjesën e sipërme të veshit tim të djathtë. E kuptova menjëherë se diçka nuk shkonte kur dëgjova një fërshëllimë, të shtëna dhe menjëherë ndjeva plumbin të çante lëkurën time. Kisha shumë gjakderdhje, kështu që atëherë e kuptova se çfarë po ndodhte. ZOTI E BEKOFTË AMERIKËN!”.

Ndërkohë, i menjëhershëm ka qenë edhe reagimi i presidentit aktual, Joe Biden.

“Nuk ka vend në Amerikë për këtë lloj dhune”, tha Biden.

Ndryshe, personi i armatosur u vra nga një anëtar i një ekipi kundërsulmues të Shërbimit Sekret.

Ai është identifikuar nga FBI si Thomas Matthew Crooks, 20 vjeç, dhe gjatë aktit po qëndronte në një strukturë të ngritur, rreth 200 deri në 300 metra larg tubimit, i armatosur me një pushkë AR. /Telegrafi/