Partitë në Maqedoni vazhdojnë fushatën, kërkojnë votat e qytetarëve më 15 korrik

Partitë politike në Maqedoninë e Veriut i kanë vazhduar aktivitetet në kuadër të fushatës parazgjedhore për zgjedhjet e 15 korrikut. Gjatë takimeve me qytetarët, ata kërkojnë besimin e tyre dhe respektimin e protokolleve shëndetësore.

Telegrafi Maqedoni ju sjell të përmbledhura aktivitetet e ditës së djeshme të partive, të cilat do të garojnë në zgjedhje më 15 korrik.

Koalicioni “Mundemi” i udhëhequr nga LSDM, në të cilin bënë pjesë edhe Lëvizja Besa, mbrëmë ka mbajtur tubim në Ohër.

“Koncept të ri, me program të ri dhe mbi të gjitha me ekonomi zhvillimore. Do t’u mbajmë leksione ekonomike edhe Mickoskit edhe kuadrove të tij ekonomik, por edhe leksione rajonit. Sepse kemi potencial, vendndodhje të shkëlqyer gjeografike, popull të zellshëm, njerëz të cilët nuk kursehen vetëm kërkojnë mundësi korrekte që me nder të fitojnë. Por edhe për këtë që tani kemi miq, e jo armiq, dhe për këtë që na respekton e mbarë bota. Për këtë do të kemi sukses”, theksoi lideri i LSDM-së Zoran Zaevi në tribunën parazgjedhore të mbajtur mbrëmë në Ohër.

Ndërsa koalicioni i udhëhequr nga OBRM-PDUKM, ka qëndruar në Resnjë, prej ku Hristijan Mickoski kërkoi “kthimin e krenarisë kombëtare”.

Mickoski tha se falë politikave të gabuara të kësaj udhëheqësie të LSDM-së të udhëhequr nga Zaevi, Maqedonia shënon rekord sipas numrit të të sëmurëve dhe njerëzve, për fat të keq, e humbin jetën e tyre dhe se pikërisht për këtë tani më shumë nevojitet që të gjithë të qëndrojmë së bashku sepse vetëm kështu mundemi ta rindërtojmë Maqedoninë.

BDI dje ka mbajtur tubim në Tetovë, ku fjalime kanë mbajtur Teuta Arifi dhe kandidatët për deputetë në njësinë e gjashtë zgjedhore, Florin Besimi, Bajram Rexhepi dhe Fitore Ziberi, si dhe shefi i shtabit qendror pranë BDI-së, Fatmir Besimi.

“Është koha kur të gjithë duhet të punojmë dhe të bashkohemi rreth një ideje dhe qëllimi që është mbi çdo ndarje dhe dallim që mund ta kemi mes veti si shqiptarë. Ky qëllim mban emrin Kryeministri i Parë Shqiptar. Kur jemi bashkë, jemi shumë të fuqishëm. Kjo është një kauzë kombëtare shqiptare. Kjo është ëndrra jonë kombëtare. Ëndrra e barazisë së plotë, ëndrra e një shoqërie që fjalët i kthen në vepra”, tha Teuta Arifi.

Koalicioni Aleanca për Shqiptarët dhe Alternativa, mbajtën konventën promovuese për zgjedhjet e 15 korrikut. Konventa u mbajt në sheshin Iliria në Tetovë ku u prezantuan kandidatët për deputetë dhe bartësit e listave në të gjitha njësitë zgjedhore ku garon ky koalicion.

Krerët e partive në koalicion Ziadin Sela dhe Afrim Gashi thanë se po fillon një kapitull i ri për shqiptarët e Maqedonisë së Veriut. Ata u zotuan se më 15 korrik do të vijë ndryshimi për shqiptarët./Telegrafi/