Papa thotë se plani i Trumpit për të dëbuar emigrantët është “turp”

Papa Françesku ka thënë se planet e Donald Trumpit për të dëbuar emigrantët e paligjshëm nga SHBA, do të ishin një “turp” nëse do të realizoheshin.

Duke folur për një program televiziv italian nga rezidenca e tij në Vatikan, Françesku tha se nëse planet do të realizoheshin, kjo nuk do të ishte e drejtë sepse sipas tij nuk zgjidhen kështu problemet.

Në një mesazh drejtuar Trumpit të ndarë të hënën, Papa Françesku i ofroi atij “përshëndetje të përzemërta” dhe i kërkoi atij të udhëheqë një shoqëri “pa hapësirë ​​për urrejtje, diskriminim apo përjashtim” dhe të promovojë “paqen dhe pajtimin midis popujve”.

Papa dihet se e ka të shtrenjtë çështjen e emigrantëve. Ai tha se “puna sistematike me të gjitha mjetet për të larguar emigrantët” ishte “një mëkat i rëndë”, transmeton Telegrafi.

Në vitin 2016, para zgjedhjeve të para presidenciale të fituara nga Trump, Papa Françesku tha se “një person që mendon vetëm për ndërtimin e mureve dhe jo për ndërtimin e urave, nuk është i krishterë”.

Duke iu referuar premtimit të Trump për të ndërtuar një mur në kufirin me Meksikën për të penguar emigrantët të udhëtojnë në SHBA, Françesku tha: “Unë them vetëm se ky njeri nuk është i krishterë nëse ka thënë gjëra të tilla”.

Françesku dhe Trump u takuan më vonë kur Trump dhe familja e tij vizituan Romën në 2017.

Para zgjedhjeve presidenciale në SHBA në vitin 2024, Papa nuk pranoi të thoshte nëse njerëzit duhet të votojnë për Trump apo për kundërshtaren e tij demokrate Kamala Harris, thjesht duke i nxitur njerëzit të zgjedhin “të keqen më të vogël” sipas ndërgjegjes së tyre.

Gjatë intervistës të së dielës në mbrëmje, Françesku preku edhe çështjen e migrimit në Evropë, duke thënë se kishte “shumë mizori” dhe se të gjithë kishin “të drejtën të qëndronin në shtëpi dhe të drejtën për të emigruar”.

Papa shtoi gjithashtu se disa nga vendet e Evropës Jugore që pranojnë më shumë emigrantë, “nuk kanë fëmijë dhe kanë nevojë për fuqi punëtore”.

“Në disa nga këto vende, ka fshatra të tëra që janë bosh. Një politikë e mirë dhe e mirëmenduar e migrantëve do të ndihmonte gjithashtu vende si Italia dhe Spanja”, tha ai. /Telegrafi/