I panë si rrezik, pronarët e një varke qëllojnë mbi ‘balenat vrasëse’ në brigjet e Gjibraltarit – policia nis hetimet

Disa pamje të publikuara në internet thuhet se tregojnë pronarët e varkave me vela duke qëlluar mbi balenat – gjë që ka nxitur kërkesat për një hetim nga aktivistët e të drejtave të kafshëve.

Sipas mediave të huaja, përcjell Telegrafi, videoja tregon pasagjerët e një varke me vela duke qëlluar mbi një grup orkash jashtë Tarifa, në ngushticën e Gjibraltarit, ndërsa balenat vrasëse rrethuan anijen dhe dukej se po përplaseshin me të.

Turistët dhe ekuipazhi në një varkë afër balenave u dëgjuan duke u bërtitur pronarëve të jahteve përpara se kapiteni i saj t’i binte borisë së anijes.

Partia spanjolle për të drejtat e kafshëve PACMA tani po kërkon një hetim urgjent për incidentin, i cili ndodhi të enjten pasdite rreth shtatë milje detare larg Tarifa.

Nuk ishte menjëherë e qartë se çfarë lloj arme ishte përdorur në përpjekje për të trembur balenat vrasëse dhe për t’i ndaluar ato të dëmtonin e jahtin.

Raportet lokale treguan se ajo ishte një pushkë ajrore dhe disa kanë sugjeruar madje se mund të ishin përdorur edhe fishekzjarre.

Ata që kryen sulmin janë identifikuar nga policia pasi u gjurmuan në një port në provincën e Almerias në Spanjën juglindore.

Është bërë kontrolli i mjetit lundrues dhe personat, kombësia e të cilëve nuk është bërë publike, kanë njoftuar se janë nën hetim për të përcaktuar nëse është kryer një krim. /Telegrafi/